Nagkadaghan ang hinabangan

Sukwahi sa laraw sa Sugar Regulatory Authority nga ipang-apod-apod ang 4,000 ka metriko toneladang nakumpiska’ng smuggled nga asukal ngadto sa mga tindahan sa Kadiwa, namahayag si Senador Risa Hontiveros nga itugyan ang maong mga asukal ngadto sa DSWD aron ipanghatag na lang sa mga kabos. Daw managsama ra ang tumong sa SRA ug sa senador: ang pagtabang sa kabos. Apan ni’ng ilang mga sugyot, angayan tamdon ang pagtulon-an sa panultihon nga, “Ang pagpunay’g hatag og subsidiya o hinabang nagdugang lang sa gidaghanon niadtong gipanghinabangan.” Fezteleern!

Wrong spelling

Mipadayag sa ilang pagsupak ang advocate group nga Drug Policy Reform Initiative (DPRI) sa paggamit sa mga pulong “adik,” “durugista” ug “drug abuser” kay aduna kini dili maayo’ng sangputanan tungod sa stigma nga ihatag niini sa hingtungdan. Basin baya naumol ang maong mga pulong dili aron pagyubit sa mga hingtungdan kon dili pag-ila lang sa matang sa iyang pagkinabuhi. Makapahinumdom sa sepultorero nga samtang nag-inspection sa sementeryo usa ka gabii, nakabatyag nga adunay nagpunay’g silsil sa ngalan sa lapida sa nitso busa iya kining gisuna. Mitubag ang tawo sa mabugnaw’ng tingog nga, “Gi-ahak ni’ng mga tawhana, ila man gi-wrong spelling akong ngalan. Ako lang gikorehian.” Unswaaa!

Tigbantay sa kalinaw

Namahayag si CCPO Director Colonel Ireneo Dalogdog nga maka-responde gilayon ang kapolisan sa bisan unsang alarma sulod lamang sa singko minutos. Makapahimuot ang maong pamahayag sa CCPO Director apan sayod kita nga ang katawhan naghandum sa kasulbaran sa mga krimen ug dili lang kutob sa pagresponde sa kapolisan. Niining dapita, dako pa ang bulohaton sa kapolisan alang sa katagbawan sa katawhan. Kay kon kutob ra ang polis sa pagresponde apan walay kasulbaran sa krimen, daw tinuod ang pagya- ugal-bugal nga “Ang Polis tigbantay ra gyud sa kalinaw.” Madahaaan!

Bungol kon way tiil

Gikataho nga ang buaya nga nakaplagan didto sa usa ka lawa sa New York City ug gidala ngadto sa Bronx Zoo aron unta mamaayo, namatay ra usab gumikan sadaghan’g injuries bisan pa man sa pag-tambal ug pag-timan niini. Sukwahi kini sa estorya sa usa ka estudyante nga mi-eksperimento sa nadakpan niya’ng “kapan” (grasshopper). Sa una’ng pagputol sa tiil, iyang gipakuratan ang kapan ug milayat kini. Gibalikbalik niya ang proseso sa pagtangtang sa tiil ug sa pagpakurat sa kapan nga modayon usab paglayat. Sa dihang nahurot na ang mga tiil sa kapan, iya kining gipakuratan apan wala na kini molayat kay wala na man kini tiil nga isikad. Niini mihukom ang estudyante nga “Kon wala na’y tiil ang kapan, bungol na diay kini.” Pagkatoytoy!

With small ‘bolo’

Gipahinumduman ni Cebu City Vice Mayor Raymond Alvin Garcia ang kapolisan sa CCPO nga angayan usab nilang respetohan ug tamdon ang ordinansa sa syudad kabahin sa operasyon sa mga legal nga buwangan sa dakbayan. Ginaingon nga ang pagpamuwang usa ka personal nga desisyon ug dili legal nga diskusyon. Makapahinumdum sa polis nga naghimo’g report human nila rondaha ang tigbakay. Usa sa mga ebidensya nga nasikop mao ang manok nga aduna pa’y tari sa tiil. Apan tungod kay wala siya masayod ingon man ang iyang mga kauban kon unsay iningles sa tari, iya na lang gisuwat sa report nga, “Confiscated chicken with ‘small bolo’ in feet.” May’pag moligeed!