Unsaon pagpatuman?

Dakong hagit alang ni Cebu City Mayor Michael Rama unsaon pagtuman iyang  deklarasyon nga sugod unya sa Hunyo 12, Independence Day, wala nay basura ug mga libodsuroy  nga mangatulog diha sa kadalanan.

Matud sa mayor 24/7 nga bantayan sa mga tinugyanan sa dakbayan aron masunod ang mando sa mayor. Isog  ang mayor nga mihimo sa deklarasyon sa way panagana nga siya sudyaang bakakon human unya sa Hunyo 12.

Lisod nga mahanaw ang basura sa kadalanan hangtud nga molampos ang mayor pag-usab sa kinaiya sa mga tawo. Ug di mahimo ang pag-usab sa naandang batasan sa tawo sud lang sa usa ka pamilok.

Taas ang panahon nga gikinahanglan aron tul-iron ang naandang hiwi nga batasan. Nagkinahanglan ni og seryoso ug makanunayong pagbadlong ug pagpahamtang og silot kun gikinahanglan hangtud nga inanay nga maanad ang tawo ug mahimo na nga kabahin sa iyang sistema ang disiplina. Mao ni ang nahitabo sa Singapore—estrikto ug makanunayon ang ilang pagdisiplina sa ilang mga molupyo hangtud nga nahimo na kini nilang batasan.

Labaw na nga imposible ang buot mahitabo sa mayor nga paghipos sa mga libodsuroy gikan sa kadalanan sulod lang sa kapin sa usa ka buwan. Unang pangutana, asa man ibutang sa syudad ang mga way pinuy-anan nga anaa nagpuyo ug nagpakabuhi sa karsada? Aduna bay pasilidad ang dakbayan sa Sugbo alang sa mga libodsuroy?    

Ug sigun sa kasinatian, bisan kapila pa hiposa sa syudad ang mga libodsuroy, mobalik gyud gihapon sila sa kadalanan. Gisuwayan na ni sa makadaghang higayon apan wala magmalampuson. Makadaghan na gihipos sa syudad ang mga namuyo sa daplin sa karsada pinaagi sa paghatag nila og plete pauli sa ilang mga probinsiya apan mobalik lang gyud kini gihapon.

Bisan pa tingali og hatagan sila og kapuy-an, mobalik lang gyud gihapon sila sa kadalanan diin sila tua manginabuhi pinaagi sa pagpakilimos. Ang panginabuhi maoy importanteng butang nga nalimtan pagtan-aw sa mayor.

Alang nako ang paghipos sa mga libodsuroy dili ingon niana ka importante nga maoy unahon pag-atiman sa mayor. Gani bisan ang ubang mga malamboong dapit  dunay mga gitawag og homeless nga anaa sa kadalanan.

Busa sigurado ko nga dili mahitabo ang deklarasyon ni Rama nga wa nay homeless nga makit-an sa kadalanan ug wa nay basura nga ibilin daplin sa karsada sugod Hunyo 12. Ambot andam na ba kaha ang mayor nga modawat sa mga sudya ug biay-biay nga iya unyang madawat.