Lisud ba gud?

Pastilan, nagkaduol na gyud ang deadline sa pagrehistro sa mga simpak sa cellphone, apan daghan pa kaayo ang wa makarehistro kay lisud kuno kaayo.

Wa may problema kon i-deactivate sa mga telcos ang inyong mga simpak kay makahimo man mo pagpalit og bag-ong simpak, apan bag-o na sab ang inyong mga numero.  

Sa ato pa, pahibaw-on na usab nimo ang imong mga amigo nga bag-o na ang imong numero. Kon ang imong numero sa simpak gigamit sa imong online account, samot kahasol.

Ang uban migamit pa sa ilang mga numero sa GCash, ug sa ubang mga transaksyon. Mao nga para nako, mas nindot gyud nga irehistro dayon ninyo ang inyong mga simpak.

Ang kadagkoan sa Globe Telecom ug ubang mga Telcos, nagpahinumdom gyud kanato kanunay nga irehistro ang inyong mga Simpak kay ang deadline karon nang Abril 26.

Matud sa kadagkoan sa Department of Information Communication and Technology (DICT) nga mga 1/3 lang sa kinatibuk-ang gidaghanon sa simpak ang narehistro.

* * *

Pero samtang nagkaduol na ang deadline ug daghan pa ang wa morehistro sa ilang simpak, misiaw sab hinuon pag-ayo ang mga scammers.

Ilang gipang-hack ang mga private account sa Facebook, dayon kontakon nila ang mga “friends” sa maong mga tawo nga na-hack nila ang mga account ug pangitaan og paagi nga sila makakwarta.

Mao na nga kon dunay mga tawo nga nahimo na nakong amigo sa Facebook, unya mopadala og laing friend request, dili gyud ko mo-accept.

Kon mosipyat man gani nga maka-accept ko, dili gyud ko motubay basta manghuwam na og kwarta, o kaha mangayo. Nakasuway ko kaniadto nga usa nako ka kaila, manghuwam kuno’g kwarta, apan wa ra nako tagda.

Wa pa kaayo mosiaw kaniadto ang mga scammers, apan wa gyud ko mailad. Gihunahuna nako nga kakwartahan sa akong amigo, unya manghuwam siya’g kwarta? Ilara Tits.

* * *

Nangita gyud og away sa kagamhanan sa Dakbayan sa Sugbo ang kadagkoan sa Cebu Port Authority (CPA).

Karon, mobawos na si Mayor Michael Rama ug gimandoan na niini ang iyang mga abogado nga ikiha ang kadagkoan sa CPA kay naghimo sila’g straktura daplin sa dagat ug sapa nga way permit.

Nagsugod ra gyud ni’ng panagbangi nila ni Mayor Rama ug sa kadagkoan sa CPA dihang gusto nilang angkunon ang bakanteng luna tupad sa karaang Compania Maritima, aw apil sab ang karaang estraktura.

Way lalis nga pantalan ang kilid sa Compania Maritima kaniadto, ug dunggoanan kana sa mga barko, apan ang Department of Public Works and Highways (DPWH) maoy nagpa-reclaim nianang maong dapit aron mahimong kabahin sa Cebu South Coastal Road.