Pamakak: Salaod o pamolitika

Matud ni Presidente Marcos, Jr., anaa sa maayong kahimtang ang suplay sa bugas sa nasud bisan pa man luyo sa taho nga mosaka na usab ang presyo sa bugas sa umaabot nga pipila ka semana  ug naningkamot pag-ayo ang kagamhanan nga mamentinar ang presyo sa bugas sa merkado.  Barato ang estorya, gani wala man kini bayad. Apan ang pamahayag sa Presidente dili makatabon sa tinuoray nga kahimtang kay masuta man kini sa higayon nga mopalit na’g bugas ang katawhan.  Mao kana’y giingon nga, “Kon ang katawhan mamakak sa kagamhanan, salaod kana.  Apan kon ang kagamhanan maoy mamakak sa katawhan, politika kana.”  Fezteleeern!

Nagyagaw ang “choir”

Luyo sa pasalig sa Presidente nga anaa sa maayong kahimtang ang suplay sa bugas, giduso usab sa NFA ang kagustohan niini nga moangkat ang nasud og 330,000 ka metriko toneladang bugas agi’g pagpangandam sa gipanglantawan nga kakulangon sa buffer stock karong tuiga.  Ang maong gidaghanon sa buffer stock motubag sa siyam ka adlaw nga panginahangln sa tibuok nasud sugod karong Hulyo 2023.  Tataw nga nagtrokis ang pamahayag sa mga opisyales sa kagamhanan mahitungod sa tinuod nga kahimtang sa suplay sa bugas.  Ang obsesyon sa NFA ug DA sa importasyon, maoy hinungdan nga nagyagaw ug nagkayabag ang tingog sa mga “kantora” sa kagamhanan.  Fishkots!

Apili’g sardinas

Sa may kalambigitan’g balita, giaprobahan na sa DBM ang alokasyon nga P1.8 billion alang sa one-time rice assistance ngadto sa mga empleyado sa nasudnong kagamhanan. Gimando kini sa President pagseguro sa kaayohan sa mga empleyado kinsa makadawat og tag-25 kilos nga bugas matag usa.  Bugas lang ang giingon nga ipanghatag apan walay de lata.  Makapahinumdum sa bata nga naminaw sa iyang inahan nga nag-ampo nga unta hatagan sila’g bugas sa Ginoo.  Niini, misagbat ug misugyot ang bata sa iyang inahan sa pag-ingon, “Nay, apili pud og sardinas pagpangayo ni Lord.”  Bitaw sad!

Dili masipyat ang target

Repasohon sa mga ekonomista sa administrasyon’g Marcos ang growth targets karon’g tuiga human nga nabatyagan nga mikunhod ang inflation sa Marso ngadto sa 7.6 porsiyento. Giingon usab nga ang kasamtangan’g kahimtang sa patigayon nagpadayag nga ang ekonomiya sa nasud may posibilidad nga makakab-ot sa gipunting nga growth targets. Dili gayod masipyat ang target sa gobiyerno kabahin sa pagtubo o pagkunhod sa ekonomiya. Kay kon magkulang, pun-an, unya kon mosubra, kuhaan.  Makapahinumdum sa tambag sa bilyako nga instructor sa firing range nga aron dili kuno masipyat inig firing, ang maigo sa bala inig pusil maoy hinganlan og target.  Madahaaan!

Aron dili katulgon

Girelibohan ug gipaubos sa imbestigasyon ang duha ka polis sa Abellana Police Station 2 nga nakuhaan og hulagway samtang nahikatulog sulod sa ilang patrol car nga nagparking sa dalan General Maxilom Avenue sa dakbayan sa Sugbo.  Atol unya sa imbestigasyon, mahimo’ng irason sa duha ka polis nga “Gibuhat nila kadto aron dili na sila katulgon sa panahon sa ilang pagtrabaho, kay nakatulog na man sila samtang nagtrabaho.”  Pagkatoytoy