Malisyoso ang motibo

Girelibohan dayon sa ilang pwesto ang duha ka mga sakop sa Abellana Police Station nga nakuhaan og hulagway samtang nangatulog sulod sa patrol car nga nagparking daplin sa karsada diha sa General Maxilom Avenue.

Ang duha nga nagranggo og sarhento ug corporal gibalhin sa holding unit sa Cebu City Police Office (CCPO) samtang mag-atubang og pre-charge investigation tungod sa paglapas sa lagda sa National Police Commission.

Si Col. Ireneo Dalogdog miingon nga kalapasan sa memorandom 2016-002 sa Napolcom ang pagkatulog panahon sa duty.

Ang pangutana nangatulog ba gyud ang duha ka polis atol sa ilang duty? Kun basihan ang hulagway nga gi-upload diha sa Facebook makita ang duha sulod sa patrol car nga nag-irag sa lingkoranan ug daw sa nagpiyong ang mga mata.

Apan igo na ba ni nga basihan aron hukman ang duha nga nangatulog samtang nagduty?

Usahay ang mga butang nga makita sa mata wala magtug-an sa tinuod.

Dunay mga higayon nga limbongan kita sa atong kaugalingong mga mata.

Busa sa mga sitwasyon nga ingon niini mahinungdanon ang pagsusi sa nagpahipi nga motibo sa mga nalambigit sa kontrobersiya.

Unsa may motibo sa nagkuha sa hulagway sa iyang pag-upload niini sa Facebook? Igo lang ba siyang nagpakabana o malisyoso ang iyang motibo nga buot niyang pakauwawan ang kapolisan?

O buot lang siyang manimawos sa kapolisan tungod sa pagkasikop sa iyang amahan kaniadto tungod sa kalambigitan niini sa illegal nga drugas?

Dunay kalainan sa pagkatulog ug pagtagpilaw samtang naghuwat og alarma.

Angayan nato nga hinumduman nga ang duha ka polis nadistino isip patrol crew ug maoy gitahasan pagresponde kun dunay mga alarma sud sa ilang jurisdiction.

Di man tingali sayop kun nipahuway sila samtang naghuwat og alarma? Gawas pa naa sila sa daplin sa karsada sa dapit nga ubos sa ilang jurisdiction wala sila magbukhad og banig sud sa kwarto.

Angayan ta nga malipay nga samtang kita nahinanok ug komportable sa atong mga higdaanan dunay mga pulis nga naa sa kadalanan nagbantay og alarma, andam morespondi.