Buking ang takoban

Usa ka Koreano ang nasikop sa mga operatiba sa Bureau of Immigration didto sa NAIA sa dihang misuway kini pagbiya sa Pilipinas ginamit ang Philippine passport. Nasakpan ang maong Koreano kay wala magkadimao ang iyang mga tubag sa bisan yano nga mga pangutana ug dili usab siya makasulti sa Filipino dialect.  Makapahinumdum sa Bol-anon nga miagi og checkpoint nga gibantayan sa mga Muslim. Sa tuyo nga dili siya lisod-lisoron, nagplano siya nga mamakak nga usa siya ka muslim. Busa sa dihang gipangutana na siya kon muslim ba o kristiyano, yano kaayong mitubag ang Bol-anon sa pag-ingon, “Muslim ko Sanó.”  Pagkatoytoy!

Makigdumog sa baboy

Naglaraw ang kompaniya nga Interporc sa nasud sa Espanya nga mosulod sa retail market sa Pilipinas alang sa ilang pork exports tungod sa nalantawan nga nagkadako nga panginahanglan sa karne’ng baboy. Daan na ang Espanya nga nag-unang tinubdan sa Pilipinas sa imported nga karneng baboy alang sa mga meat processors sa nasud apan dili sa mga retailers. Mahimong hulga sa mga lokal nga mga hog raisers ang maong laraw sa Interporc. Angayan tun-an kini pag-ayo sa kagamhanan kay aduna baya’y panultihon nga “Kon makigdumog ka sa baboy, magkabulingit gyud mo’ng duha, apan nalingaw pag-ayo ang baboy.”  Ateerr!

“Be careful, Joe”

Gisaway sa Samahang Industriya ng Agrikultura (SINAG) ang Department of Agricuture tungod kay wala kini pasilidad nga mopahigayon og testing aron ma-suta unta kon aduna ba’y ASF ang mga mosulod nga imported nga karne’ng baboy, hinungdan nga mikuyanap sa ASF dinhi sa nasud. Tataw nga gipaboran sa DA ang importation policy inay paghatag prayoridad sa local pork industry.  Makapahinumdum sa traffic enforcer nga modakop unta sa usa ka traffic violator. Apan sa dihang nasuta niya nga foreigner diay ang malapason, sa kahadlok nga mahutdan og iningles, inay isyuhan og citation ticket, iya na lang giingnan ang foreigner nga “Next time Joe, be careful, ha.” Fezteleeern!

Unsaon pa’ng kumpay?

Matud pa ni Presidente Marcos, Jr., gitun-an na sa kagamhanan kon unsaon paghatag og dugang suporta ngadto sa mga beterano sa ikaduhang gubat. Alang sa presidente, angayan atimanon ang mga beterano kay sila ang naghatag sa kagawasan nga atong gitagamtam ug gipahimuslan karon. Kon tinud-anay ang katuyoan sa pagtabang sa mga beterano, kinahanglan nga dalion kini paghatag sa gobiyerno. Dili malalis nga anaa na sila sa kasadpan sa ilang kinabuhi.  Kay kon dugayon pa, maigo gayod kita sa panultihon nga, “Unsaon pa ang kumpay kon patay na ang kabayo?”  Muleeeng!

Tabang katawhan

Nanawagan ang National Anti-Poverty Commission (NAPC) sa publiko nga motabang sa programa sa gobiyerno alang sa pagbatok sa kakabos ug kapobrehon sa nasud. Angayan tingale nga ipunting sa NAPC ang maong panawagan sa mga adunahan. Salikwaot hunahunaon nga kadtong benepisyaryo unta sa programa pagbatok sa kakabos, apil nga pangayoan sa tabang. Ni’ng panawagan sa NAPC nga patabangon ang tanan’g katawhan sa pagbatok sa kakabos, nahisama ra nga gitulis sa gobyerno ang bakol aron ihatag sa pungkol.  Madahaaan!