Kulang sa pagpakabana

Sumala sa Department of Agriculture, adunay pagsaka sa presyo sa bugas sa umaabot nga mga semana tungod sa taas usab nga farmgate prices sa palay tungod sa huwaw, sa kataas sa presyo sa mga farm inputs ug kakulang sa buffer stock.  Apan wala mahingawa ang DA niini ug miingon lang gani nga normal ang pagsaka sa presyo labi pa kay ting-init na. Natapos na ang kwarisma, apan wala pa diay matapos ang kalbaryo nga sagubangon sa katawhan.  Ni’ng pagbale-wala sa DA sa pagsaka sa presyo sa bugas nga labing batakan nga panginahanglan, haum kanila ang panultihon nga, “Dili kasilag ang tugbang sa gugma kon dili kakulang sa pagpakabanâ.”  Fezteleern!

Damgo ang panaghi-usa

Malaumon si Bise Presidente Sara Duterte nga ang diwa sa Kwarisma magdasig sa mga PilipIno sa paghiusa alang sa pagpanday sa kalambuan sa nasud.  Dugang pa sa Bise Presidente, angayan ituboy sa kahi-usahan ug ihikling sa mga panagsungi alang sa usa ka maki-angayon ug maki-tawhanon nga katilingban.  Idlas kab-oton ang kahi-usahan.  Kon mismo ang mga relihiyon o sekta nga nagsangyaw sa kaluwasan ug kahiusahan, wala magsinabtanay ug managlahi ang baruganan, ang katawhan pa kaha.  Matud pa sa akong amigo, “mas magkahiusa pa ang mga bana kon makadungog sa siyagit ug kasaba sa asawa.”  Pagkatoytoy!

Pagka-usikan sa tawo

Buot si Senador Nancy Binay nga mopahigayon ang senado og imbestigasyon sa makapa-alarma nga pag-usik-usik sa pagkaon aron makaumol og mga polisiya ang Senado kabahin sa pag-usik-usik sa pagkaon ilabi na kay daghan ang mga Pilipino nga nakasinati’g kagutom.  Wala gayo’y maayong sangputanan ang bisan unsa’ng matang sa pagka-usikan, labi na sa pagkaon.  Matud pa bitaw, “ang pag-usik-usik sama ra nga gisakmit mo ang pagkaon nga alang unta sa mga kabus ug gigutom.  Sa kinaiya sa katawhan karon, haum ang panahom nga, “Gipugos nato pagpatubo sa atong kayutaan ang mga pagkaon nga wala na’y mokaon.”  Madahaan!

Gahi’g ulo

Mipasidaan ang DA-Bureau of Fisheries and Aquatice Resources (DA-BFAR) nga ang mga kinhason ug mga pasayan o “alamang” nga makuha sa kabaybayonan sa Bohol, Samar, Surigao del Sur ug Zamboanga del Sur natestingan nga positibo sa red tide toxins ug dili luwas nga kan-on.  Hinaut nga palapdan sa BFAR ang maong pasidaan ug hinaut usab nga maminaw ug motuman ang katawhan. Ni’ng kahimtanga, dili angayan nga tamdon ang panultihon nga, “Ang pagka-gahi’g ulo maoy hinagiban sa mga mahuyang”.  Muleeng!

Likayan ang pagpasundayag

Gipahimangno-an sa kapolisan ang publiko nga magmabinantayon sa pag-post sa social media ug mga real time updates sa ilang mga lakaw, ug mga selebrasyon atol sa Semana Santa kay basin maka-kompromiso kini sa ila’ng kaluwasan ug seguridad tungod sa oportunidad nga mahatag niini sa mga dautan.  Bulawanon ang maong pahimangno sa kapolisan.  Apan sayod kita nga daghan ang mahilig gayod mopasundayag sa social media sa ilang mga kalihukan hinungdan nga adunay ma-scam o ba kaha makawatan.  Husto ang pahimangno nga “Think before you click” nga sa ato pa, “Huna-hunaa sa dili pa ipasalida.”  Mao man!

Ang Dios Miingon

Ni Rev. Fr. Rey Cui

Alive, alive forever more

Abril 09, 2023

Domingo sa pasko sa pagkabanhaw sa ginoo

Mga Pagbasa: Buh. 10;34, 37-43/Sal. 118/Col. 3;1-4/Jn. 20;1-9Lk. 24;13-35

Niadtong gamay pa ko, mao kini ang kanta nga akong nadungog kaniadto labina kun motambong ko sa mga prayer meetings sa Catholic Charismatic Movement. In fairness dasig baya ang maong kanta mao tingali wa ko kalimot niini bisan kun gungis na apan wala gihapon ko makalimot ning maong kanta.

Tungod kay karon panahon man sa Domingo sa Pagkabanhaw, angayan lamang nga magmaya kita ug magsadya!

Nabanhaw ang Ginoo! Buhi siya! Buhi Siya! Ug matud pang San Juan Pablo Segundo: “We are an Easter People and Alleluia is Our Song.”

Hinuon dili  kita makatugkad sa bili ning Domingo sa kabanhawan kondili kita moagi sa Domingo sa kasakitan.

Kining maong pagmatuod ginamit ang mga mata sa pagtuo ang atong Ginoo wala magpabilin nga nahinlansang sa krus, wala siya magpabilin diha sa kalibotan sa mga patay. Hinunoa iyang gibuntog ang kamatayon.

Ang atong Ginoo himo og panaad nga mouna siya sa iyang mga tinun-an ngadto sa Balay sa iyang Amahan aron kun asa gani siya atua usab ang iyang mga higala. Mag-una siya aron mag-andam siya og luna alang sa iyang mga higala.

Ang atong mga suliran maoy nakapalubong kanato sa kawalay paglaum ug padulngan.

Ning atong panaw sa kinabuhing Kristohanon ang Dios nagdapait kanato nga dili kita magpabilanggo diha sa tumang kaluya. Bakasyonista lamang kita ning kalibotana.

Ang Dios nga atong nailhan dili Dios sa mga patay kondili sa mga buhi. Busa kitang tanan gitawag aron magpuyo sa kinabuhi diha sa Dios nga madagayaon uyamot gayud! Happy Easter sa tanan!