Regular nga  inspeksiyon

Labing minus 24 ka mga public utility vehicles ang nasakpan sa mga sakop sa inter-agency task force sa Department of Transportation (DOTr) atol sa random inspection nga dili luwas nga mobiyahe.

Kini tungod kay hilis na ang mga ligid, gubaon ang wiper, buak ang windshield ug uban pa nga mga depekto.

Sa 24 ka mga PUVs nga nahagbong sa roadworthiness inspection, 15 niini mga bus samtang 9 ang mga van.

Gitug-an hinuon ni LTO-7 regional director Victor Caindec nga inay isyuhan og ticket tungod sa kalapasan gihatagan lang nila og higayon ang mga operator nga ayuhon ang mga depekto.

Gipasalig sab sa LTO nga magpadayon ang ilang pagpahigayon og random check niining panahon sa Semana Santa aron masiguro nga luwas ang byahe sa mga pasahero nga mopauli sa ilang tagsa-tagsa ka probinsiya.

Ang LTFRB sa iyang bahin nibahad sa mga operators nga di padaganon ang mga depektuso nila nga mga unit aron malikayan ang mahal nga multa.

Samtang dalaygon ang paningkamot sa mga ahensiya ubos sa payong ss DOTr niining panahon sa Semana Santa, apan hinaot nga sa tanang higayon nila himoon ang pagsusi sa kaluwasan sa mga PUVs.

Kini tungod kay di lang sila panahon sa Semana Santa nga nagdagan ug naghakot og pasahero.

Mas maayong regular ang ilang himoon nga inspection sa roadworthiness sa mga pampublikong sakyanan aron malikayawan ang mga disgrasya nga posibling mokalas og kinabuhi.

Gipangilugan ko nga naghuna-huna nga dunay 24 ka mga PUVs nga di diay roadworthy apan namasahero. Kun di pa Semana Santa  di masakpan nga nagpadayon sila pagbiyahe bisan piligroso alang sa mga pasahero.

Ang pasabot niini naay mga tinugyanan sa ahensiya nga gitahasan niini nga nagtanga ug molihok lang kun dunay okasyon. Mura'g  lansang nga di motaop og di pukpukon og martilyo.

Kun mahimo sa DOTr ang pagpahigayon sa random inspection kun dunay dagkong okasyon nga gipaabot ang pagdagsa sa mgabpasahero, way rason nga di ni mahimong regular nga gimbuhaton.

Angayang hinumduman nga importante ang kaluwasan sa mga pasahero sa tanang higayon Semana Santa man o ordinaryong adlaw sa semana.