EDITORYAL - Magmantinir lang gihapon?

Way kwestyon ang abilidad sa mga sakop sa Armed Forces of the Philippines sa pag-mentinar sa ilang mga gamit. Maayong moayum-ayom ug momantinir ang mga sundalong Pilipino.

Ebidensiya niini kining mga karaan na kaayong mga gamit sa panahon sa Ikaduhang Kalibutanong Gubat nga padayon pa gihapong nagdagan o gigamit sa kasundalohan karon, sa laktod pagka-estorya, mantinir lang kay walay ikapalit.

Mao nga usahay himuon silang sumsuman sa pagbiay-biay sa publiko nga klaro pud mga wala say kabangkaagan sa tinud-anay nga rason kun nganong naingon kini niini.

Ang ilaha lang pirmeng isulti, kurapsyon sa mga opisyales sa gobiyerno, nga dili ikalimod, maoy tinuod ug kining kawala nilay panglantaw sa umaabot.

Kasagaran aning maong mga gamit nga mga karaan na kaayo apan padayong gi-operate sa militar naa sa Philippine Navy. Kaning mga barkoha gigamit pa sa mga apohan sa mga kasamtangang sakop karon sa Philippine Navy.  Hinuon pipila nalang kini ka buok sanglit aduna namay mga modernong barko ug mga surplus  nga mas bata-bata pa kaysa sa mga karaan nilang gigamit karon, salamat sa donasyon gikan sa Amerika ug uban pang kaalyadong mga nasud sa Pilipinas.

Ang Philippine Navy maoy gitahasan sa pagdepensa ug kun gikinahanglan makiggubat sa mga buot mopasipala sa Pilipinas diha sa kadagatan. Apan sila mao karoy nihit og mga modernong kagamitan sama sa mga barko, pasilidad, abyon ug uban pa.

Ang PN ug ang Philippine Air Force mao gyuy frontline sa depensa sa nasud, mao nga sila maoy nagkinahanglan og dakong pundo kay mahal ang mga barko ug mga abyon kun itandi sa mga gamit nga gikinahanglan sa Philippine Army. Dunay AFP Modernization Act nga padayong nagdagan, pipila sa mga gamit ang nangabot na ug duna pay daghang wala pa. Ang uban hangtud karon wala pa masugdi kay kulang sa pundo ug kining pagsige og diki-diki sa mga magbabalaod sa paghatag niini.

Gani, kaning AFPMA, hapit nang matapos sa tuig 2028, apan tungod aning mga problemaha, halos wala pa katunga sa naplanong buot paliton alang sa modernisasyon ang natuman. Kung magpadayon ning sistemaha, ini og kakumpleto sa mga gipangayong modernong mga gamit sa AFP, magpabilin gihapon kining maoy kinahuyangan  dinhi sa Southeast Asia,  kay “obsolete” na sab ilang mga napalit anang mga panahona.