Molaban sa mikagiw

Bisan wala pa’y naluwatan nga arrest warrant alang kang Kongresman Arnolfo Teves, Jr., giisip na ni Justice Secretary Remulla nga usa ka fugitive ang kongresista tungod kuno kay ang panglihok-lihok niini, nahisama na man sa tawo nga mikagiw ug buot moipsot sa balaod. Daw gibase ni Secretary Remulla ang iyang panahom sa panultihon nga, “Ang pagkagiw timaan sa kasal-anan.”  Apan dili pud tingale maayo nga magpunay lang og hisgot ang kalihim kabahin ni Kongresman Teves.  Ang tawo baya mahilig molaban ug mopabor sa mga mikagiw ug mga gipanglutos.  Basin baya ni’ng pagpuna’yg maldisyon ni Secretary Remulla sa kongresista, bati-on na hinoon og kalooy ug molaban na ang katawhan sa naulahi.  Madahaaan!

Buhi ug piskay

Nanawagan ang mga lokal nga magpapatigayon sa Sugbo nga tun-an pag-ayo ang mga ekonomikanhong implikasyon sa giproponer nga balaodnon nga giduso sa Gabriela Partylist kabahin sa paghatag og duha ka adlaw nga paid menstrual leave sa tanan’g babaye nga empleyado. Dili ikahibulong ang reaksiyon sa mga kapitalista’ng magpapatigayon apan dili usab ikalimod ang kahasol nga bation sa mga babaye kon duawon na sa binulan nila’ng “bisita.” Dalaygon ang katakos ug kaisog sa mga babaye nga bisan giagasan og daghan’g dugo sa taas nga panahon, buhi ug piskay lang gihapon. Muleeeng!

Nagpili og lamok

Namahayag si Chairman Garcia sa COMELEC nga adunay laraw ang ahensiya nga mosagop na sa automation sa pagpahigayon unya sa mga umaabot nga barangay ug Sangguniang Kabataan elections (BSKE).  Dako’g bentaha kon automated ang eleksiyon apan dili kini kaseguroan nga walay limbong nga himoon ang mga politiko.  Matud pa bitaw sa akong amigo, “Bisan unsa pa ang paagi sa pagboto, automated man o mano-mano, ang matag eleksyon walay kalainan kay ang botante daw nagpili ra sa iyang paborito nga lamok gikan sa hut-ong sa mga lamok.”  Fezteleern!

‘Road under construction’

Adunay gitagana nga pundo ang DBM nga 1.74 bilyon ka pesos karong tuiga alang sa modernisasyon sa Bureau of Fire Protection.  Ang maong pundo gamiton alang sa pagpa-usbaw sa mga pasilidad ug pagpamalit og dugang fire trucks ug mga emergency rescue equipment.  Bisan kon gitagana sa modernisasyon sa BFP ang maong pundo, tataw nga kulang pa ang kapasidad, mga himan ug equipo sa maong ahensya kon itandi sa mga bombero sa ubang nasud.  Apan maayo na lang kay gitutokan na kini sa kasamtangang administrasyon.  Kay ginaingon bitaw nga, “Ang dalan paingon sa modernisasyon, kanunay lang gyud nga ‘under construction.’”  Fishkots!

Dali ra makamata

Usa ka kawatan nga misulay unta pagpangawat didto sa usa ka balay sa Marikina City ang nasanta tungod sa pagpunay’g paghot sa mga iro nga naka-alerto sa mga tag-iya sa panimalay. Nagpamatuod kining hitaboa nga mas maayo nga guwardiya ang mga iro kon itandi sa tawo. Makapahinumdum sa aplikante pagka-security guard nga sa dihang gipangutana kon unsa ang iyang maanindot nga hiyas isip guwardiya, mitubag dayon sa pag-ingon nga, “Aw, ako hinoon, Sir, dali ra kaayo ko makamata bisan diyotay lang kasikas.”  Pagkatoytoy!