Amahan ko Pasyloa sila kay wala sila Masayud sa Ilang Gibuhat
Unsay nakapahimo natong lahi sa mga mananap? Ang nakapalahi nato mao man nga kitang mga tawo dunay gahum sa pagpili. Kitang mga tawo gihatagan man sa Dios ug kaantigohan nga mohimo og desisyon. Desisyon kun unsay maayo ug unsay dautan. Sa latkod aduna kitay kasayuran.
Apan ngano man nga ang atong Ginoo ning unang pulong nga gikan sa nanghingutas niyang gininhawa namulong man: “AMAHAN KO! PASAYLOA SILA KAY WALA SILA MASAYUD SA ILANG GIBUHAT?” Nagpasabot ba kini nga wala silay kahibalo sa mga panghitabo niadtong mga gutloa? O kun nasayud man gani sila nahimong nabutaan gumikan sa ilang kaugalingong kataphaw. Taphaw tungod kay ang bato nga ilang gisalikway gumikan kay walay kapuslanan ang nahimo naman hinuong mahinungdanong bato sa kanto nga naghatag og kalig-on sa balay? Padayong gitay-og ang atong hunahuna ug pagbati. Tungod kay diha sa atong panaw, pagtikang palang daan nahimong haguka nang daan ang atong pagpili.
Kay unsa man diay ang atong gikinahanglan ning kinabuhi? Ato kining ma summarize ning tutulo ka mga pulong English. AWARENESS, ACCEPTANCE, AVAILABILITY.
Awareness kun ang pagkaamgo sa tinud-anay nga kahimtang sa atong panaw kun estado pinaagi lamang sa maong kaamgohan kita mamahimong makasugod pagtugkad sa dakong bili sa pagpasaylo sa atong kaugalingon ug sa atong isigkaingon. Apan subo palandungon daghanan kanato ang dili buot makaamgo tungod sakit ang pag-amgo nga kita mga samaran man diay nga dako. Ang atong panaw ingon nga simbahan dili makalahutay tungod kay daghanan kanato ang buot modawat nga kiita samaran. Ug dili lang kini kutob sa atong kaamgohan sa atong kahuyangan, kinahanglang duna kitay pagahimoon kalabot niini.
Acceptance kun ang pagdawat maoy sinugdanan sa atong panaw padulong sa gidamgo natong kahiusahan ingon nga katawhan. Ang managlahing baruganan usahay nakaapekto sa atong pagsabot sa kaluwasan. ang pagpangangkon nga maoy bugtong naghupot sa kamatuoran usahay nakapahimo kanatong mahukmanon hinuon sa uban. dili kita buot modawat sa bugtong rason nga komportable na kita sa bakak. Kay lagi sakit man ang kamatuoran. Apan nahikalimot kita sa giingon sa atong Ginoo nga ang kamatuoran mao man ang magdala kanato sa kagawasan. Subo lang palandungon nga daghan nato ang buot magpabiling binilanggo sa atong kaugalingong panlantaw.
Availability Ang synodality nagdapit kanato nga mamahimong abli ug tagana sa hagit sa Dios alang kanato diha sa atong padayong pagpamalandong sa iyang kabubut-on alang sa atong personal ug katilingbanong pag-ampo ingon man ang atong mahimo ingon nga resulta sa inspirasyon nga gihatag sa Dios sanglit ang Dios nilihok man diha sa paagi nga kita iyang gidasig. Amahan ko pasayloa sila kay wala sila masayud. Tungod kay ang kanhi mga tawo nga giayo ni Jesus niadtong mga panahona mao man pud kadtong mga tawo nga nisinggit sa makusog,, patya siya! Patya!
Unta human sa atong kaamgohan mas maantigo kitang mogamit sa atong gahom sa pagpili nga sa ato pa, mas pilion nato ang Dios labaw sa tanan ug siya ang atong himoong prioridad adlaw adlaw sa atong kinabuhi. Dili paigo ang paghinulsol hinunoa mas mahiungdanon kaayo alang kanato nga duna kitay himoon kalabot niini.