EDITORYAL - Amping sa pagbakasyon

Nangandam na ang kadaghanan sa pagbakasyon o pagpamauli sa ilang tagsa-tagsa ka probinsya karong umaabot nga Semana Santa. Gawas aning relihiyosong rason sa bakasyon, ang uban nagplano ng manglarga padung sa mga beach resorts, mountain resorts ug uban pa aron mag-relax.

Dili unta kalimtan sa tanan nga mag-amping sa ilang paglakaw, dili lang didto sa ilang destinasyon o padulngan kondili hasta ang ilang biyaang mga pinuy-anan.

Ang kapolisan mipahimangno nga kung dunay planong manglarga, kinahanglang seguraduhon gyud nga luwas ilang mga panimalay.

Kun dili malikayan nga wala gyuy mahibiling miyembro sa pamilya aron mobantay, mas maayong ipanugon ang balay ngadto sa mga silingan.

Ang kapolisan sa Cebu City mipahimangno sab ngadto sa mga nag-abang nga kun gusto silang mopauli sa ilang probinsiya mas labing maayong dad-on ang tanang mga importanteng mga butang sama sa mga gadgets, mga dokumento ug mga alahas.

Aning paagiha, kung duna may magkainteres sa mga butang wala silay makuhang mahalong mga butang.

Usa pa, makalikay sab ang mga nag-abang sa dakong problema sa mahanaw nga mga gamit ug dokumento kun pananglitan dunay mahitabong sunog sa ilang giabangang balay.

Sa pag-abot unya ngadto sa mga resorts, dili gihapon magkumpiyansa ug pabiling mag-igmat sa tanang oras tungod kay kun asa ang dapit nga dugokon og daghang mga tawo, siguradong naa sab ang mga badlungon nga nagpaabot lang nga makabinta.

Sa paglipaylipay dili sab magpalabi sa mga ilimnong makahubog ug likayan nga makakita og gubot sa laing bakasyonista.        

Ang panahon sa Semana Santa mao gyud unta ang adlaw igpamalandong sa tanan. Aning mga panahona ang gihulagway sa Simbahan nga panahon sa paghinulsol sa mga sala ug pagpalig-on og balik sa espirituhanong koneksyon ngadto sa Kahitas-an.

Apan wala may but-anay kun unsay buhaton sa tawo anang mga adlawa, mas labing maayong mag-amping nalang ug mag-enjoy sa bakasyon kauban sa pamilya ug mga higala.