Pagbudhi sa industriya sa asukar
Mao diay’ng wa gyod motingog silang Presidente Ferdinand Marcos Jr. ug Executive Secretary Lucas Bersamin pagsagang sa pasangil ni Senador Risa Hontiveros. Nga ang Malakanyang maoy nagpasiugda sa smuggling sa 5,000 metric tons nga asukar gikan sa Thailand. Nga nidunggo sa pantalan sa Batangas bisan wa pa mapirmahi ni mapublikar ang Sugar Order No. 6.
Kay bisan sa ilang pag-apura sa importasyon ug sa pagpili nang daan sa ilang paborito nga sugar importers, natanggong ang kargamento. Kay wa mosugot sa ilang palusot ang Sugar Regulatory Administration (SRA).
* * *
Bisan gipasaligan nga gitugotan nilang Marcos ug Bersamin ang importasyon, nagdumili si Outgoing SRA Administrator David John Thaddeus Alba pagpirma sa clearance aron nga i-release na sa Bureau of Customs (BOC) ang 260 ka 20-footer containers nga asukar sa gi-bendisyonan sa Malakanyang nga All Asian Countertrade Inc.
Bisan sa memorandum niadtong Pebrero 27 ni Department of Agriculture (DA) Senior Undersecretary Domingo Panganiban, ang pangabaga ni Marcos sa DA ug SRA, nahibaw-an ni Hontiveros nga nibalibad si Alba. Gipasidunggan ni Hontiveros ang kaisog ni Alba. Kinsa posibleng wa lay laing kapilian.
* * *
Kay kon mapamatud-an nga smuggled ang kargamento, maalkanse ang sektor nga girepresentahan ni Alba sa SRA. Sa wa pa itudlo ni Marcos nga puli ni kanhi SRA Administrator Hermenegildo Serafica niadtong Agosto sa niaging tuig, si Alba ang general manager sa Asociacion de Agricultores de La Carlota y Pontevedra ug sa La Carlota Mill District Multi-Purpose Cooperative sa Western Visayas.
Posibleng usa sa nakapahilom sa Malakanyang sa eskandalo mao ang pagkondenar sa mga haligi sa lokal nga industriya sa asukar sa smuggling.
* * *
Ang joint statement gipirmahan nilang Enrique Rojas, presidente sa National Federation of Sugarcane Planters; Aurelio Gerardo Valderrama Jr., pangulo sa Confederation of Sugar Producers Association Inc.; Pablo Lobregat, presidente sa Philippine Sugar Millers Association; ug Danilo Abelita, presidente sa Panay Federation of Sugarcane Farmers.
Silay nagrepresentar sa sektor nga giulug-ulogan ni Marcos sa pagbasura kunohay sa Sugar Order No. 4 sa niaging tuig. Sa wa pa mabisto ni Serafica nga ang presidente maoy nag-apura sa mas dakong importasyon. Naglibog pa tingaling Malakanyang unsaon pagpasabot ang transaksiyon nga giisip sa industriya nga economic sabotage.
* * *
- Latest
