Angay nga mouli si Teves

Midas-og na ngadto sa makuting inbestigasyon ang linuog nga pagpatay kang Negros Oriental Governor Roel Degamo ug laing walo ka indibidwal didto sa lungsod sa Pamplona sa maong probinsiya dili pa lamang dugay.

Ang dagan sa inbestigasyon sa otoridad nagpunting ngadto sa anggulo sa away sa politika ug partikular nga gitumbok ang pamilyang Teves, kansang miyembro ang gipulihan ni Degamo sa puwesto human gi-nullify ang iyang kadaugan sa Commission on Elections.

Gihatagan og gibug-aton sa otoridad ang anggulo sa politika. Kini ilabina nga ang nag-unang gitumbok sa maong krimen tua nagluklok sa Estados Unidos ug mora’g walay plano nga mouli aron pag-atubang sa alegasyon batok kaniya.

Rason ni Kongresista Arnulfo Teves nga nahadlok siya sa iyang kinabuhi kon mouli siya sa Pilipinas. Basin usab kuno kon patyon siya sama kang Degamo. Hinuon iya gayung gihimakak ang iyang  kalambigitan sa maong masaker.

Niining pagdumili sa magbabalaud pag-uli sa nasud aron pag-atubang sa mga akusasyon, kuyaw nga mapunting gayud ang mga tudlo sa katawhan ngadto kaniya nga may kalabotan sa kamatayon ni Degamo ug uban pa.

Aron pagpapas sa mga pagduda, angay lamang nga mouli si Teves sa nasud aron pag-atubang sa maong alegasyon ug mobundak og mga ebidensiya nga nagpamatuod nga wala siyay kalambigitan sa maong krimen.  Kay kon padayong magluklok ang kongresista didto sa Estados Unidos, dili gayud kalikayan ang persepsiyon sa katawhan nga iyang gilikayan ang maong mga alegasyon ug ang inbestigasyon pagtino sa luyo sa pagpatay sa gobernador.

Hinuon daghan ang nakauyon sa dagan sa inbestigasyon. Positibo ang mayoridad nga masulbad sa dili madugay ang kaso sa usa sa labing ngilngig nga krimen sa Negros Oriental. Hinuon, mogawas ra gayud ang kamatuoran bisan pa sa padayong pagoryogoryo sa kampo ni Teves.