EDITORYAL - Karon ang haom sa pagpangandam
Karon nga opisyal ng gideklarar sa PAGASA ang pagsugod sa ting-init, makaginhawa na ang mga tawo gikan sa kanunay nga mga pagbaha diha sa kadalanan ug sa ilang mga dapit, lakip na usab gikan sa mga pagdahili sa yuta diha sa kabukiran.
Apan mas labing maayo nga gamiton kini nga kahigayonan sa tanang mga local government units ingon man sa Department of Public Works and Highways aron manglimpyo ug pangayuhon ang mga baradong mga kanal ug kasapaan.
Ang DPWH adunay komprehensibong flood control projects karon dinhi sa Metro Cebu, apan nabantayan nga daw nihinay ang pagtrabaho sa pipila aning maong mga proyektoha.
Sa pikas bahin, ang mga LGUs pud unta, ilabi na ang mga barangay officials mohimo og mga proyekto karong mga panahona para sa pagsulbad sa problema sa baha diha sa ilang mga lugar.
Partikular niini kadtong mga lupa nga bahin sa mga barangay ug kadtong dunay mga dagkong kanal nga natabunan na sa mga basura ug lapok, kinahanglan kining habwaon karong menus na ang pag-uwan.
Gawas sa mga pagbaha, motumaw kanunay kining peligro sa mga pagdahili sa mga yuta diha sa mga komunidad sa kabukiran matag panahon sa tinguwan nga lisud trabahoon anang mga panahona.
Karon nga tinginit na, dili unta kalimtan sa mga tawo ilabi na sa mga naa sa katungdanan ang mga angayan nilang buhaton pagsiguro sa kaluwasan sa tanan.
Daan naman nasayod ang mga hingtungdang mga ahensiya sa nasudnon ug lokal nga gobiyerno kun asa ning mga dapita nga dunay problema panahon sa tinguwan.
Kaning panahon sa tinginit maoy haom sa pagpahigayon og mga disaster preparedness and disaster mitigation progams diha sa mga lokalidad, dili kay ini og sugod na og igo sa bagyo ug mga pagbunok sa uwan ayha pa makahinumdom sa mga angayan gyud untang gibuhat sa wala pa mahitabo ang katalagman.
- Latest