EDITORYAL - Importante ang CCTV

Responsibilidad sa gobiyerno ang pagsiguro sa kaluwasan sa katawhan niini. Bisan ang ordinaryong indibidwal dunay katungod nga buhaton ang tanan alang sa seguridad niini apil na niini ang paggamit sa modernong teknolohiya.

Usa niini ang paggamit na karon og close circuit television camera sa mga pribadong indibidwal diha sa ilang mga panimalay ug sa mga gipanagiyang establisamento. Para sa ilang proteksyon ug interes.

Mao kini ang rason sa mga local government units nga nagmuntar na og mga CCTV cameras sa mga estratehikong mga dapit sa ilang hurisdiksyon.

Partikular na niini ang mga kadalanan, mga hilit ug sudlonong mga bahin sa mga barangay. Magamit kini sa mga otoridad sa pag-monitor sa ilang mga dapit apil na ang pagbantay batok sa mga krimen.

Gani daghang mga krimen ang nasulbad tungod sa tabang sa kuha sa mga CCTV cameras nga nakamuntar sa mga dapit diin nahitabo ang krimen.

Sagad sa mga kriminal wala masayod nga dunay CCTV sa lugar nga ilang gipiling buhaton ang krimen. Apan bisan gani nakahibalo ang mga kriminal bahin sa mga CCTV mosugal gihapon sila paghimo sa ilang dautang plano tungod sa tentasyon.

Tungod niini, ang kapolisan seryuso kaayo sa ilang hangyo sa mga LGUs nga pabutangon og  mga CCTVs ilabi na sa mga dapit nga dugokon pirme og mga tawo.

Apil sa ilang giawhag ang mga pribadong establisamento sa pagmuntar og CCTVs alang sa dugang seguridad.

Kinahanglan lang nga kini mentinahon sa tanang panahon, nagpasabot nga kinahanglang dunay pundo nga igahin ang LGU aron masiguro nga padayon kining mag-andar.

Samtang tuod dili kini makapakgang sa mga kriminal paghimo sa ilang mga dautang plano, makatabang kini og dako sa mga imbestigasyon nga pagahimuon sa kapolisan kun dunay mahitabo sa lugar.