EDITORYAL - Cha-cha, Con-con para ba gyud ni sa tanan?

Kaning tinguhang pag-usab sa kasamtangang 1986 Constitution maayo lang kun kini makapausab ug maoy makapanindot sa kasamtangang sistema nga gitamdan sa tanan.

Kanang kausaban nga tinud-anay nga makapataas sa kabutang sa mga Pilipino ilabi na sa mga kabus nga pirmeng mabiyaan sa uban ug dili sa interes sa pipila lang ka mga magbabalaod ug sa ilang mga negosyo.

Si Senador Robinhood Padilla nagtinguha nga magpahigayon og charter change kay gusto niyang pang-usbon ang mga economic provisions nga sa iyang tan-aw maoy nakaingon nga dili makabwelo ang patigayon dinhi nga makapasaka sa ekonomiya sa Pilipinas.

Samtang sa Ubos Balay Balauranan, giduso sab nila ang ilang bersyon nga hybrid constitutional convention o con-con. Mas dako kining trabaho itandi sa cha-cha ni Padilla.

Sa con-con kinahanglang magkuha og mga constitutional experts ug mga magbabalaod aron maoy maghimo og pagtuon sa tanang kausaban sa mga probisyon ug magkinahanglan og dakong pundo para sa ilang mga sweldo, bayad sa mga plete ug venues kon diin sila magtigum.

Ang pagusab sa kasamtangang konstitusyon dili unta gamiton sa mga interesadong pundok o political parties para sa pagabante sa ilang kawsa o ilang mga plano ug dili para gyud sa kinatibuk-ang katawhang Pilipinhon.

Subo lang sab kaayo nga samtang tuod dunay mga konsultasyon nga gihimo kabahin aning ilang mga plano, apan ang tinuod niini, ang mga nanambong nga supak dili man sab paminawon.

Kadto rang mga daan ng uyon sa pagusab sa Konstitusyon mao ra ilang madunggan ug ang ilang mga sugyot nga ipabutang unya sa mga probisyon matuman.

Dili makiangayon, walay delicadeza  ug makauuwaw kun kining mga magbabalaod nga nagduso aning pagusab sa Konstitusyon himuon lang kini alang sa ilang interes ug sa ilang mga partido o ba kaha negosyo.

Matawag kini nga pinakataas nga klase sa kurapsyon, labaw pa kini sa pagpanuhol tungod kay ang mismo na gyung batakang balaod nga tamdan sa tanang mga balaod nga pandayon ilaha nang impluwensiyahan ug hugaw-hugawan sa ilang personal nga interes.