Ang ICC

Ipadakop sa International Criminal Court (ICC)si Russian President Vladimir Putin tungod sa krimen sa gubat sa pagpalayas sa mga bata sa nasud nga Ukraine. Sa una nga warrant of arrest nga gipagawas niini, ang ICC mipadakop ni President Putin tungod sa pagduda nga mipalayas kini sa mga bata nga wala masubay sa balaud nga pagbalhin sa mga tawo sa Ukraine ngadto sa Russia.

Ang Russia nga dili sakop sa ICC miingon nga walay pulos ang gihimo sa hukmanan. Ang Russia sa makadaghan nga higayon mihimakak sa pasangil nga ang mga sundawo niini nakahimo og pagpang-abuso sa pag ataki niini sa Ukraine.

Ang ICC mao pod kini ang mipadala og mga imbestigador dinhi sa Pilipinas aron imbestigahon ang gilusad ni kanhi Presidente Rodrigo Roa Duterte nga gubat batok sa gidili nga drugas diin giingon nga liboan ka tawo ang gipatay ubos sa kalapasan sa tawhanong katungod. Ang Pilipinas mibiya sa iyang pagkasakop sa ICC. 

Ang ICC namugna niadtong tuig 2002 basi sa Rome Statute. Gimugna kini aron lutoson ang mga nakahimo og war crimes, crimes against humanity, genocide ug crime of aggression.

Ang ICC makahimo sa paglutos sa mga krimen nga nahimo sa mga nationals nga sakop sa ICC o niadtong anaa sa teritoryo sa sakop nga estado o nasud diin ang uban maoy naghimo sa krimen.

Ang ICC aduna kini 123 ka mga sakop nga estado o nasud ug may gahin kini nga salapi nga moabot ngadto sa 170 milyones ka euros.

Ang ICC mihimo na kini og 17 ka mga imbestigasyon gikan sa Ukraine ug mga nasud sa Africa sama sa Uganda, Democratic Republic of Congo ug Kenya ngadto na sa Venezuela sa Latin America ug Asia sama sa Myanmar ug Pilipinas.

Bisan suportado sa kanasuran nga sakop sa United Nations ug European Union apan ang mga dagko ug gamhanang mga nasud sama sa Amerika, China ug Russia dili sakop niini tungod sa pagtuo nga magamit lamang kini alang sa political prosecutions.