Balaod sa mga kawatan

Nabaniog na sa tibuok kalibotan nga may mga empleyadong nadestino sa Ninoy Aquino Internatioan Airport (NAIA) nga mga kawatan. Ug kini gimatuod sa usa ka pasaherong turistang Thai, kinsa nakakuhag video footage gamit iyang selpon sa aktuwal senariyo giunsa pagkawat sa mga taga Office for Transportation Security (OTS) ang kuwarta sa pitaka sulod sa bag sa laing turistang Thai.

Usa ka sikat Panlasang Pinoy You Tube vlogger uban sa iyang pamilya, human sa dekada kaping pag-estar sa Amerika, miduaw sa iyang mga ginikanan ug kaparyentihan sa Manila sa miaging Disyembre 2022 aron adto makighugop pagselebrar sa ilang Pasko, puwerting kahisagmuyo pag-abot sa balay sa iyang mga ginikanan. Kay pag-abli sa ilang luggages, daghan usab ang nangawala: mga signature bags, perfumes, glasses, chocolates ug Nike shoes.

Nabuhatan kini niyag vlog nga gititulohag: ‘Our Bad Experience Travelling to the Phillipines’. Hinuon, wala siya mamasangil sa taga NAIA nga maoy mibuhat sa maong pagpangawat. Sanglit matod niya, tulo man ka airport ilang naagian: Chicago, San Francisco ug NAIA.

Pagka very professional nga vlogger. Bisag nasamad na ilang kasingkasing, gilikayan gihapon niya nga magkahugaw ang imahe sa NAIA.

Dili sama niadtong turistang Thai nga dihang nawad-ag kuwarta, mihangyo gilayon sa taga OTS, NAIA nga ipasusi-view sa CCTV ang hitabo. Diin dihang mibalibad nga walay CCTV ang maong sensitibong lugar, ang video footage gikan sa laing turista maoy gipakita. Ug  wala na makanegar ang mga kawatan.

Apan makapahibulong. Si Bureau of Immigration Commissioner Norman Tansingco mipabarog og balaod-pahibalo sa NAIA nga nag-ingon: ‘The use of cellular phones or video recording devices, sharing of videos/photos of any immigration personnel is strictly prohibited.’

Pastilan, nganong dili man iparekord-pakuhaag personal private videos ni Tansingco ang actual performance sa iyang gingsakopan niining NAIA nga duna nay daghang lama sa korapsiyon ug pagpangawat? Nganong mahadlok man siyang makuhaag video ang ilang pagpangalagad sa publiko kon sila walay daotang gibuhat nga makapuling sa mga mata?

Dili ba mahadlok man ang ilaga kon may magbantay'ng iring? Unya, nganong naghimo mag patakaran si Tansingco nga pabor sa mga ilaga? Nagpasabot ba kini nga iyang higala ang mga ilaga ug kaaway ang mga iring nga mokaog ilaga?