Patay sa mga opisyal

Laing piniling opisyal na usab ang gipatay niadtong Martes sa buntag.  Ang labing ulahing biktima sa linoog  nga krimen mao si Kapitan Mario Tundag sa Barangay Manguiao, Asturias, Cebu ug ang iyang hamiling kapikas nga si Edna.

Gikan sa Balamban ang magtiayon luwan sa ilang motorsiklo dihang gipusil sila sa duha ka mga lalaki nga nagsakay usab og motorsiklo. Ang pagpamusil makita sa video nga kuha sa CCTV didto sa dapit diin nahitabo ang pagpamusil.

Hinaut nga pinaagi sa video nga mikatap na karon sa social media mailhan og dali sa awtoridad ang mga kriminal ug mapadali ang kasulbaran sa kaso. Di man tingali kapaabot ang pamilya og sama nga pagtagad sa kaso ni Negros Oriental Governor Roel Degamo nga unom gyud ka battalion sa mga sundawo wa pay labot sa kapolisan ang nagtinabangay aron paglutos sa mga mamumuno, apan hinaot nga himoon sab nga prioridad sa kapolisan ang pagsulbad niining maong kaso.

Sayo pa aron ilambigit sa politika ang hitabo tungod kay nagpadayon pa ang kapolisan sa ilang imbistigasyon pagsusi sa motibo. Apan daghan na sa mga politiko ang nabalaka sa sunod-sunod nga mga kaso sa pagpamusil diin ang mga biktima mga politiko.

Gani ang Union of Local Authorities of the Philippines (ULAP), ang kahugpongan sa mga local chief executives dinhi sa nasud, mipadayag na sa ilang kabalaka.

Bisan ang mga senador ug mga kongresista nanawagan na sa kapolisan nga santa-on ang mga kaso sa pagpangatake sa mga lokal nga opisyal.

Di hinuon ko komportable sa ilang panawagan nga gisentro alang lang sa mga opisyal sa gobyerno.

Kini tungod kay daghan sab nga mga biktima sa pagpatay nga mga ordinaryong sibilyan ug wala pa mahatagi og hustisya hangtod karon ang ilang gidangatan.

Dili husto nga tungod kay dunay pwesto ug katungdanan sa gobyerno sila ray dunay katungod nga mangayo og hustisya. Angayang hinumduman sa mga opisyal sa kagamhanan nga ang tanan, opisyal man o yanong tawo, dunay katungod nga mangayo og hustisya ug proteksiyon gikan sa gobyerno.

Mas angayan gani nga ang mga kabus ug wa mailhi sa katilingban maoy hatagan og prioridad sa gobyerno tungod kay sila maoy labaw nga mas nagkinahanglan.