Gipabayad sa dalan

Gireklamo sa pamilyang Sy ang Casals Village Homeowners Association tungod sa pagsirado sa dalan nga gipanag-iya sa siyudad nga naa nahimotang sulod sa ilang village. Gawas nga gisiradoan ang ilang dalan, ang association nangolekta pa gayod og bayad sa mga sakyanan nga moagi sa village.

Ang pamilyang Sy nga gipangulohan ni Eduard Sy nagpuyo na sa Casals Village nga nahimotang sa Barangay Mabolo dakbayan sa Sugbo sukad pa niadtong tuig 1986.

Ang Casals Village adunay 17 ka mga dalan nga adunay kinatibok-ang gidakon nga 1.7 ka ektarya nga gidonar ngadto sa dakbayan sa Sugbo niadtong tuig 1980. Basi kini sa talaan sa General Services Office human sa gihimo nga beripikasyon niadtong Disyembre 2020. Kay gidonar na ngadto sa siyudad, ang naulahi na ang nag-atiman ning maong mga dalan apil na ang mga kanal niini.

Apan duha sa 17 ka mga dalan ang permanente nang gisiradoan sa homeowners association nga walay pagtugot sa konseho sa dakbayan sa Sugbo. Gawas nga gisiradoan, nangolekta pa gayod og bayad ang asosayon sa mga sakyanan nga moagi sa dalan sa Village.  Nagtukod pod sila og straktora nga walay building permit.

Sigun sa nalatid sa Section 21 sa Local Government Code, ang permanente ug temporaryong pagsira sa dalan nanginahanglan og 2/3 nga boto sa konseho sa dakbayan nga nagtugot niini. Sa pagsusi, ang konseho sa siyudad wala magpalabang og ordinansa nga nagtugod sa pemanente ug temporaryong pagsira sa mga dalan sulod sa Village.

Si Ernesto Guiduquio, ang presidente sa asosasyon, miangkon sa pasangil apan mipasabot nga ang ilang pagpabayad sa moagi sa dalan alang kini sa pagmintinar sa dalan samtang ang duha ka dalan nga gisiradoan alang kini sa ilang seguridad. Ila kining gisiradoan kay dili sila makasuweldo og security guard. Gawas niini, aduna pay duha ka dalan nga adunay guard houses padulong sa Barangay Kasambagan.

Walay pagtugot sa siyudad sa Sugbo ang pagsira sa dalan ug labaw pang wala itugot ang pagpabayad sa asosasyon sa mga moagi sa dalan.

Dili ba momando ang siyudad sa pagpahunong sa gihimo sa asosasyon?