Daw giibtan og balhibo

Mipadayag si Presidente “Bongbong” Marcos, Jr. sa iyang suporta sa giproponer nga balaodnon nga gitumong sa pagpatong og taas nga buhis sa mga “luxury” o non-essential goods.  Apan luyo ning pagsuporta sa presidente, daghan gihapon ang moping-it kon pabayron na sa buhis. Kay lagi ginaingon man nga “Walay buhis nga maayo.”  Alang sa katawhan, ang pagbayad sa buhis nahisama sa pagpangibot sa hapit tanang balhibo sa lawas sa itik sa paagi nga walay mabati nga agak-ak sa kasakit gikan sa itik.”  Madahaan!

Politiko ang hinungdan

Mimando si Mayor Michael Rama sa kapolisan pagdakop kang bisan kinsa nga sakop sa Cebu Ports Authority (CPA) nga mangolekta’g parking fees diha sa M.L. Quezon Road, haduol sa nataran sa Compania Maritima.  Alang sa mayor, hinanggaw (stupid) ang maong buhat.  Misilaob na ang gubat nga gideklarar sa mayor batok sa CPA. Adunay kamatuoran ang panahom nga “dili kasundalohan maoy magsugod sa gubat kon dili mga politico.”  Sa kasaysayan, ang gubat nahitabo aron pag-usab sa mapa sa kanasuran.  Apan ang gubat sa Cebu City ug CPA, gitumong sa pag-mapa unta sa kausaban sa Compania Maritima.  Abangan!

Naay ‘small rain’

Sa pagpasar sa House Bill 6717, gitugotan sa Kongreso ang pagsuspenso una sa paggamit sa ‘mother tongue’ o lumad nga sinultihan isip medium sa pagtudlo sa kindergarten hangtud sa Grade 3.  Ang ‘mother tongue’ mao kadtong pinulongan nga una’ng nakat-onan nga malitok ug masabtan sa bata.  Buot ba ipasabot nga dinhi sa Visayas ug Mindanao, Tagalog o Iningles na ang gamiton, ug dili na ang pinulongan’g binisaya, sa pagtudlo sa kabataan?  Lisod baya kaayo mag-inusapay sa Tagalog.  Basin kon pasudlon na sa maestra sa classroom ang bata kay naay alindahaw, moingon na lang nga “Get inside because there is small rain.”  Pagkatoytoy!

Mentally absent

Ipahunong na ni Cebu City Mayor Michael Rama ang naandan nga pag-check sa attendance sa mga empleyado atol sa flag raising ceremony matag Lunes.  Nabatyagan sa mayor nga napunting lang ang atensyon sa mga empleyado sa pagpalista inay sa pagpamalandong sa tinud-anay nga lintunganay ug kamahinungdanon sa maong kalihokan.  Maingon nato nga lawas ra sa mga empleyado ang mitunga sa maong seremonyas apan mikagiw ang ilang hunahuna.  Mas salawayon kon ang pagkagiw sa hunahuna sa mga empleyado molanat pa gayod human sa seremonyas ug hangtod na sa ilang pagtambong sa trabaho. Mao kanay giingon nga “Physically present, mentally absent.”  Fezteleern!

Dili mag-ija-ija

Mopahigayon ang Human Resource Development Office sa kagamhanan sa dakbayan sa Sugbo og orientation-training kabahin sa kultura ug kasaysayan sa nasud nga Singapore aron ma-edukar ug masabtan sa mga empleyado ang panglantaw ug tinguha sa mayor nga makab-ot ang Singapore-like Cebu City. Maanindot ang maong lakang sa HRDO.  Kinahanglan’g masayod ang tanan’g empleyado kon asa ang padulngan ug kon unsa ang gimithi nga tingusbawan aron mahatag sa usag-usa ang gikinahanglan nga suporta.  Dili mahimo ang magbinagsa ug labaw na nga dili pwede ang mag-ija-ija.  Muleeeng!