EDITORYAL - Limitasyon sa presyo sa bombay

Usa ka maayong balita kining pamahayag nga gibutangan og limitasyon sa Department of Agriculture ang pagsaka sa presyo sa imported nga sibuyas bombay. Balita kini nga makapaginhawa og gamay nga dugay na kaayong miutong nga Pilipinong konsumidor.

Ang DA miingon nga gilimitahan lang kutob P125 kada kilo ang suggested retail price ang imported nga pulang sibuyas bombay.

Layo ra kaayo sa pasiatab sa usa magbabalaod pipila ka semana na ang milabay nga moabot og P50 kada kilo ang maong produkto human nangailhan na kinsa ang mga giingong nanago niini aron paburoton ang presyo sa merkado.

Ang presyo sa bombay nagsugod og saka niadtong Septiyembre sa nakalabay nga tuig ug niabot pa gyud kini og lapas P700 kada kilo niadtong bulan sa Disyembre nga taas kaayo ang demand niini.

Mas mahal pa sa presyo sa usa ka kilong baka, baboy o manok. Mao nga ang ubang mga inahan sa panimalay ug mga kusinero nakat-on pagluto og putaheng wala nay sibuyas bombay.

Tungod sa kamahal sa maong matang sa lamas, gihimo gani kining bouquet sa kasal ug daghang nanggawas sa social media nga memes nga nangomedya nga kun duna kay bombay adunahan n aka.

Samtang maayong paminawon para sa konsumidor ang pagtibugsok sa presyo sa imported nga sibuyas bombay, manghilak sa kaguol ang mga lokal nga maguuma niini tungod kay sigurado nga mous-os sab ang presyo sa ilang abot ug mas halinon unya ang imported tungod sa kabarato.

Kaning mga sitwasyon angay manginlabot ang gobiyerno, dili pataka og paburot sa presyo ug dili sab patuyang og ubos kay kinahanglang lantawon pud ang kahimtang sa mga lokal nga maguuma.

Ang makaguol niini, kaning P125 matag kilo sa sibuyas bombay nga imported adto lang sad ipatuman sa Metro Manila. Unsaon naman ang sa Cebu o sa Mindanao? Magpabilin gihapong mahal?