Nganong nitak-om ug nitago
Ang panghudlat ni House Speaker Martin Romualdez sa pagpapriso sa smugglers sa sibuyas, nga gibasol sa artipisyal nga kanihit sa suplay ug sa pagsulbong sa presyo, di makapapas sa mga pagduda sa kalit nga pagkanselar sa hearing sa House Committee on Ways and Means nga tambongan unta sa gipasanginlan nga brokers ug consignees.
Ang hearing nga gitakda untang himuon sa alas-9 sa buntag niadtong Enero 30, Lunes, gikanselar ni Committee Chair Joey Salceda pinaagi sa text message ngadto sa mga sakop sa komitiba sa alas-5 sa kadlawon sa samang adlaw.
* * *
Si Salceda nga labihan ka-tabian wa mopasabot sa iyang kaubanan nganong wa madayon ang hearing. Kapin sa semana nang naglikay-likay sa mga sakop sa media nga nahibulong nganong nikalit lang og kapawong ang ka-agresibo sa iyang mga hudlat sa paghukas sa smugglers ug pagpapriso nila.
Bisan si Kongresista Horacio Suansing, nga niapura ni Salceda pagsupina sa iyang ginganlang 10 ka brokers ug 12 ka consignees, tak-om na. Wa nay naghisgot ni Michael Ma, ang giingong nakigkonsabo ni Martin Araneta, manghod ni First Lady Liza Araneta Marcos, sa onion smuggling.
* * *
Ang kalit nga pangisog ni Speaker Romualdez di sab makapasabot sa misteryuso nga pagpakahilom ni Presidente Ferdinand Marcos Jr. Kinsa, isip acting agriculture secretary, mao untay mangu sa kampanya batok sa maniobra sa sibuyas ug ubang produkto sa agrikultura.
Ang nagbaha nga press releases sa speaker di sab kalipat sa atensiyon sa publiko sa pagtago sa first lady. Nag-apil-apil siya sa kontrobersiya sa militar pero nangiyugpos sa eskandalo nga naglambigit sa iyang kaugalingong manghod.
* * *
Nabantang sab ang kataphaw sa pangisog ni Speaker Romualdez:
• Gihagit niya ang Department of Agriculture (DA) paghatag og mga ngan sa gidudahang smugglers pero padayong gitabonan ang samang lista sa iyang kaugalingong mga kongresista tungod lang kay makapauwaw sa iyang ig-agaw ug bayaw; ug
• Gipasaligan niyang DA og dugang gahom ug pundo aron masulbad ang problema sa way paghunahuna nga nagnihit ang suplay ug nisulbong ang presyo sa sibuyas tungod sa ka-inutil pagbadlong, o pakigkonsabo sa DA, sa mapahimuslanong mga negosyante. Sa way paghisgot nga nakatampo sa krisis ang dakong haw-ang sa liderato sa DA tungod sa pagpatuga-tuga sa presidente.
* * *
- Latest
