Patrolya sa kahanginan sa kapolisan

Mas gipa-level up pa karon sa Police Regional Office-7 ang ilang pag patrolya sa mga dapit nga ubos sa ilang area of jurisdiction dili lang sa yuta kon dili apil na sa kahanginan.

Sa naandan ang foot patrol himoon sa atong kapolisan isip kabahin sa pagpalig-on sa ilang monitoring sa mga kasikas sa palibot ug pagsumpo sa mga krimen.

Apan karon gigamit na nila ang kahanginan sa pagpaniid sa mga panghitabo sa palibot pinaagi sa teknolohiya, ang pagpalupad og drone camera diin epektibo kaayo sa pag-monitor sa kalihokan sa mga tawo.

Adunay 40 ka mga drone patrolers ang giumol sa kapolisan sa rehiyon kinsa gibansay ang ilang katakos sa drone patrol ug nasulayan ang katakos niini atol sa pagsaulog sa Sinulog 2023 diin nadakpan ang mga dautang elemento nga namonitor sa drone patrol.

Ang drone patrol mugna sa bag-ong director sa Police Regional Office-7 nga si P/Brigadier General Jerry Bearis nga kong wala ko masayop kini ang labing unang dapit nga naghimo og ingon niini nga systema nga epiktibo kaayo sa pagsanta sa krimen.

Hinuon dili malikayan nga basin motumaw ang mga pagsaway o kaha pagsupak ani kay basin moingon ang uban nga gamiton sa pagpangispiya ang drone patrol ug maka-invade na sa privacy.

Kadtong mga adunay dautang binuhatan ang mahadlok sa drone patrol kay sure gyud nga mabuking sila labi na kay tataw ang resolution sa camera nga apil ang pahak sa mga kriminal makuha gyud.

Kong walay dautang binuhatan, aw cool ra kaayo nga bisan mobabaybabay pa ini’g agi sa drone sa ilang nahimutangan. Bitaw para nako angayan daygon ang inisyatiba karon sa kapolisan sa rehiyon sa pagpangulo ni General Bearis.

Unta mamahimo kining sumbanan sa ubang dapit sa nasud kay kong nahimo kini dinhi sa PRO-7  mahimo usab kini bisan pa sa national, ma yuta man o kawanangan kombate gyud ang kapolisan.