Grabe’g hubog ang tubig

Daghan nang miretirong Pagcorian, kanhi mga empleyado sa Philippine Amusement and Gaming Corporation (PAGCOR), kinsa mihimo sa Starbucks, Ayala Center Cebu, nga ilang tapokanan kada adlaw’ng Sabado. Starbuck Boys ang ngalan sa ilang Facebook chatroom.

Sa miaging Pebrero 2, Huwebes, dihang may bisita silang Bisayang PAGCOR officer, kinsa gustong makig-chill sa grupo, ila kong giimbitar.

Haskang lipaya nila pagkakita nako. Unya taudtaod, miabot ang nangimbitar. Busa, gikan sa Starbucks namalhin mi sa The Social.

Pulotan, beer ug Johnny Walker Black maoy ilang gi-order. Hibawo man sila nga pinili ang pagkaon sa masakiton, giapilan ko nila’g fresh veggies. Ug kay dili na man ko moinom og ilimnong makahubog, tubig ray akoa.

Nahisgotan ang kalainan sa kanhi administrasiyon ni PRRD ug sa kang PBBM karon ug gikomparar. Ang mga piniling cabinet members ni PRRD limpyo, lig-on-kasaligan. Samtang kang PBBM lubog, huyang-makahahadlok.

Bisan ang gibutang ni PBBM nga Chairman ug Chief Executive Officer sa Pagcor, lahi ra kuno sa kanhi tsirman, kinsa proven strong and pro-employee. Sanglit ang bag-ong mipuli, kulbaan pirme ang mga empleyado sa ilang situwasiyon tungod sa gipakitang mga pamaagi niini.

Matud pa, daghang miukay sa mga nakalabayng rekord niini. Busa, nailhan kining opisyala base sa unsay ilang naukayan.

Puro negatibo akong nadungog gikan kanila. Busa, nakaingon ko, wala tumana ni PBBM ang iyang gisaad nga pulos ligdong-kasaligang opisyal ang iyang padad-on sa tanang ahensiya sa gobiyerno.

Kay kana lang sila si Justice Secretary Boying Remulla, PNP Chief Rodolfo Azurin Jr.  ug DILG Secretary Benhur Abalos, kinsa bisag gisuka na sa panilaw sa katawhan tungod sa salawayon nilang pagpangalagad, wala gyod ilisi ni PBBM.

Nagpasabot ba kini nga ilang kuwestiyonabling gawi maoy gitamdang matang sa kuwalipikasiyon sa pagpili og mga lider sa kagamhanan ni PBBM?

Ug kon unsay ilang gibuhat mao poy iyang gusto? Hinungdan, nga dili niya sila mahilabtan?

Wala tuyoa, ingon sa mibukal-misakit akong ulo tungod sa maong diskusiyon. Ug samtang nagsud-ong sa gikuptang baso nga wala nay sulod-tubig, sa hilom nakatuaw ko:

“Grabehag hubog ning tubiga, uy! Tiaw bay, abot mig Malakanyang?” Dayon, iyahay mig ibot sa among seniors’ ID aron ipakuwenta tanan namong nakunsumo.

Pilay nabayran? Nahubog mig samot!