Tinun-an nga nitabang sa biktima sa krimen pasidunggan. Kinsa siya?

Taliwala sa dugoon nga panghitabo sa may Osmeña Boulevard sa dakbayan sa Sugbo diin dunay usa ka babayeng vendor og mangga ang gigulgol ang liog sa iyang mismo kapuyo, adunay usa ka wala mailhing tinun-an ang nipakita sa iyang kaaghop sa kasingkasing nga maoy nitabang sa biktima.

Dako man nga balita ang nahitabo kay lagi dunay mora’g emotion nga nalambigit sanglit usa ka babaye ang nabiktima sa iyang gikapuyo nga lalaki gumikan sa lang sa selos o pangabubho nga nisangpot sa pagkatalandugon nga kahimtang sa biktima nga wala ganiy kasegurohan ang kinabuhi.

Ang naasoy’ng panghitabo naghatag usab og kahigayonan nga makita ang kaayo sa mga tawo nga nagpakabana ug kadtong wala magpakabana sa ilang isig ka tawo.

Base sa kuha sa CCTV footage, adunay mga lalaki nga tapad sa babayeng biktima dihang gigulgol ang liog niini sa lalaking kalit nga mitunga sa dapit, ang unang reaksyon nila nilukso ug ang uban nangaratol gani.

Apan aniay usa ka babayeng tinun-an kay naka uniporme man ang niduol sa biktima og maoy nitabang niini.

Bisan klaro nga siya mismo gibati og kahadlok sa iyang nasaksihan apan wala siya magpadala sa nerbiyus og giunongan ang biktima hangtud nadala sa tambalanan.

Anaa usay ubang mga tinun-an nga babaye gihapon ang nagpakabana sa nahitabo, anaay usa ka lalaking hamtong pero mora’g nagpanagana man og hikap  gani sa babayeng biktima.

Ang hepe sa kapolisan sa dakbayan sa Sugbo nga si Col. Ireneo Dalogdog ang nakadayeg sa gihimo sa mga babayeng nagpakabana sa pagluwas sa biktima ug maoy ilang gipangita aron mahatagan og commendation o maila ang bayanihon nga nahimo niini sa isig ka tawo.

Talagsaon na kini nga hiyas karon sa tawo nga motabang sa mga nabiktima sa krimen ilabi na kon ingon niadto ka dugoon nga makapakitbi sa atay.

Busa angayan nga ilhon ang ilang nahimo ngadto sa isig ka tawo aron mamahimong sumbanan sa uban.

Wala pa mailhi sa otoridad kinsa ang maong tinun-an, kon si kinsa ka man angayan kang saludohan!