Buslot sa sistema sa hustisya
Sakto ang kanhi nasudnong presidente sa Integrated Bar of the Philippines (IBP) nga si Domingo Cayosa:
• Ang pagpadayon sa International Criminal Court (ICC) sa pormal nga imbestigasyon sa mga pasangil sa laktod nga pinatyanay sa kampanya batok sa ilegal nga drugas ni kanhi Presidente Rodrigo Duterte nanukad sa kainutil sa sistema sa hustisya sa nasud pagtabang sa mga biktima; ug
• Ang imbestigasyon sa ICC di na kapugngan ni Duterte ug sa iyang mga sinugo, ni sa administrasyon ni Presidente Ferdinand Marcos Jr., kay way nasud nga makabuot unsay himuon sa ICC.
* * *
Sayop si Police General Rodolfo Azurin Jr., hepe sa Philippine National Police (PNP), nga way gitagoan ang kapolisan sa pagsubli sa mga kaso sa ilang mga sakop nga nakaplagang nakalapas sa mga lagda sa mga operasyon batok sa ilegal nga drugas.
Kon way gitagoan ang PNP, nganong kinahanglan mang DOJ ang mosubli sa mga operasyon? Ug nganong naabtan man og unom ka tuig ug gipaabot mang imbestigasyon sa ICC una susiha angay bang ikiha ang mga polis nga niyatak sa mga tawhanong katungod ug way kukaluoy nga niihaw sa inosenteng mga biktima?
* * *
Sayop si Justice Secretary Jesus Crispin Remulla nga angay’ng itugyan ang mga ebidensiya ug mga testigo sa ICC ngadto sa DOJ aron nga sila nay mopalig-on ug mopasaka sa mga kaso sa korte aron nga kahatagan og hustisya sa mga tagtungod sa mga biktima.
Ang rason nga way nikiha ni Duterte sa lokal nga mga korte hangtod karon, nga wa na siyay presidential immunity, mao ang kahadlok nga under-the-bunal gihapon niya ang militar ug kapolisan.
* * *
Ang PNP maoy nagpili sa 52 ka kaso nga ilang gipa-review sa DOJ. Sa kasagaran sa mga kaso, nakit-an nga ang mga polis maoy nitanom og mga ebidensiya (apil nang mga shabu ug rebolber), nangilad nga nisukol ang mga biktima (bisan giposasan ug binaklid ug bukubuko ang natusak sa mga bala) ug nagkonsabo sa pagtago sa mga timaan sa ilang pataka.
Tinuod nga di tanang huwes tinudlo ug kakak ni Duterte. Pero unsay mahimo sa ligdong ug isog nga mga huwes kon mahadlok ang mga tagtungod kay nangahagba nang nag-una nilan nga nangahas sa pagpangita og hustisya?
* * *
- Latest
