Basta kwarta, bisan kadugo biktimahon ka

Taliwala sa sige og balita mahitungod sa mga pagpangilad o gitawag na karon nga scam, aduna gihapoy mga mabiktima ma online man o personal.

Daghan man gani masugamak sa mga tam-is nga pasalig nga naka-post sa social media unsa nalang kaha kong ang suod nga kadugo na gyud ang mangumbinser ug mopasalig sa dakong return of investment sa kwarta nga gipangayo isip investor sa negosyo kuno sa mga scammer.

Sama nalang sa nahitabo sa dakbayan sa Lapu-Lapu nga nakuha gyud ang ilang kwarta nga niabot sa P4.7 million, maayo unta kon sobra-sobra ang ilang kwarta kay pwede ra seguro piyongan. Apan ang maong kwarta inutang pa man usab gikan  sa ubang tawo.

Nadani gyud intawon ang magtiayon nga mo-invest sa negosyo sa ilang suod nga kadugo, ang asawa sa scammer anaa pa nag trabaho karon sa gobyerno, ang suspek kanhi government employee usab.

Puwerti gyud ka lami moestorya tawhana nga makakombinser gyud sa mga biktima. Gawas sa tam-is nga estorya magsige usab og pahambog ang mangingilad pinaagi sa ilang lifestyle nga pirme moadto sa mga mahalon nga hotel manganon, mangaligo ug uban pa nga dinato gyud.

Apan kong tan-awon wala man laiy trabaho ang suspek, hinuon ang iyang asawa nga government employee dili pud ingon ana ka dako ang sweldo nga maka afford og mga 5-star hotel ilabi na kong parmanentihon.

Ang gigamit nga kwarta gikan diay sa mga nabiktima kay minilyon naman ang ilang nakuha, padayon ang ilang lipaylipay samtang ang mga biktima nagkagidlay.

Ulahi na ang tanan alang sa mga biktima nga mahigmata nga nailad na sila ug ambot lang kong mauli pa ang kwarta.

Kahinumdum lang hinuon ko sa kasinatian  namo sa akong asawa sa suod usab nakong kadugo nga maayo kaayo mopasalig nga mo-triple ang akong kwarta nga ipuhonan sa iyang tinda nga manok bisaya sa merkado didto sa Mindanao.

Nisalig lang pud mi kay legit business man gyud ang manokan sa merkado, apan niadtong higayona nagkahinay na  diay ug naunlod apil ang among kwarta nga gipuhonan.

Hangtud karon wala gyud mabalik ang kwarta, ako nalay maulaw maningil gilubong nalang sa limot, hasol na kong magkasohay.

Busa gikinahanglan nga magmatngon sa kanunay ug dili magpadala bisan kadugo pa kay basta kwarta na gani unayon gyud, puwera lang sa mga buotan kong anaa pa man.