Kuwarta makaamnesya

Ning panahon nga kulang sa political will sa hugtanong pagpakig-away sa gidiling drugas ang suroyang Presidente Bongbong Marcos, misamot pag-awop ang kahigayonan nga masumpo ang illegal drugs syndicates sa Pilipinas.

Kining pagpanghambog ni Department of Interior and Local Government (DILG) Secretary Benhur Abalos nga kinilong shabu ang masakmit sa kapolisan halos sa matag adlaw niining operasyon, nagpasabot lamang kini nga dili mga epektibong  hinagiban ang ilang gigamit sa War on Drugs. Kay imbes modiyotay o wala na silay masikop, nagkaanam man hinuon kadaghan.

Unsaon, ultimo sulod sa prisohan ang nangadakpan nilang drug pushers makapadayon man gihapon sa pagpangnegosyog shabu gamit ang ginadiling mga selpon kada himog transaksiyon sa kasosyong kontak sa gawas, diin makalibog nganong makalusot kini nga guwardiyado man sa mga warden ang tanang entrance-exits nga agian sa moduaw nga mga asawa, igsuon, higala o mga kadugo sa nangapriso?

Gani, hasta underwear ipahubo man aron masusi kon wala bay shabu o kontrabando nga gitago-suksok sa pribadong bahin sa lawas? Unya kontrolado pa ang mga adlaw, oras ug gidaghanon sa mga mobisita? Nganong makatener man gayod og cellphones ang pipila sa nangapriso? Buta ba ang nagsigang mga mata sa mitsek-ap?

Usa ka binilanggo nga bag-ohay pang nakagawas gikan sa Cebu City Jail Male Dormitory (CCJMD), nanabi nga aduna kunoy mga jail officer nga magpabayad og P50K ngadto P60K bugti sa ordinariyong selpon nga ipalusot ngadto sa mga kinandadohang mga rehas. Hinuon, wala itug-an sa namasangil ang mga pangalan niini.

Agi’g depensa ning maong kontrobersiya, ang spokesperson sa CCJMD mipasalig nga si Jail Superintendent Gregorio Acacio, warden, andam mokooperar ingkasog dunay himoong imbestigasiyon ang PNP ug PDEA.

Apan bisag imbestigahan pa, dili na mapapas sa panan-aw sa katawhan ang nakalusot-sulod nga selpon o ubang matang sa gadgets sa nagkadaiyang prisohan. Ang padayong shabu business transaction gikan sa sulod sa prisohan ngadto sa gawas, igo nang makahatag ideya nga aduna gyoy usa, duha o grupo sa jail personnel nga mibuhat niini.

Ug kon mahitabo nga wala gyoy usa kanilang motug-an, makahatag lamang kinig dautang impresyon nga makadamay nilang tanan. Nga tungod sa selpong P50K-P60K, sila daw naamnesiya. Wala na makailag Ginoo. Ug nakalimot sa gisul-ob nilang uniporme.