Nagpakabuta-bungol

Hangtud karon nagpabiling nagpakabuta ug nagpakabungol ang kadagkoan sa DPWH kabahin sa reklamo sa katawhan mahitungod sa libaongonnnga mga karsada.

Makapila na ko mosuwat niini, kapila na nako kini gihisgotan sa akong programa sa radyo, ug bisan ang akong mga kaubang media naghisgot sab niini — apan wa gyud tagda sa DPWH.

Sila sa DPWH maoy gitahasan pagtagad sa atong mga national roads, samtang ang Cebu City Engineer’s office maoy in-charge sa mga karsada dinhi sa syudad.

Usa ka kawani sa DPWH-Cebu City district, (dili ang district engineer) mitambong sa miting namo sa Cebu City Traffic Management Board apan way kapuslanan. Duha na ka semana gikan sa iyang pagtambong ug hangtud karon wa gyud matapaki ang dagkong libaong sa Veterans Drive, unahan og gamay sa Marco Polo Hotel.

Usbon nako, kinahanglan nga ang DPWH ug ang Department of Engineering and Public Works (DEPW) duna gyud unta’y grupo nga mosuroy aron motapak sa mga libaong.

Kon ila kining himoon, monindot ang ilang serbisyo, ug daygon sila sa katawhan. Kon moingon sila nga duna sila’y grupo nga gitahasan pag-atiman sa mga libaong sa karsada, ingnon ko sila nga nagniligoy ang maong mga kawani.

* * *

Ang mga operations officer sa Cebu City Transportation Office (CCTO), angay’ng motan-aw gyud nga ang nga traffic enforcers nato anaa sa tukma nga mga lugar.

Dili ikalimod nga adunay mga enforcers nga latagaw pa og hunahuna, ug gusto gyud nila nga magtupad sila kanunay sa ilang mga kauban aron magsultihanay.

Ang duha ka traffic enforcers nga nadestino sa eskina Sudlon sa Lahug, nag-usab na hinoon human nako nga gimaymayan kabahin sa dili tukma nila nga gihimo.

Pero sa uban nga lugar, duna pay mga enforcers nga magtupad gyud sila. Ngano man gyud nga magtupad man? Kon may dakponon didto sa unahan, unsaon man nila nga layo man sila?

Salamat kaayo sa Globe Telecom kay abtik kaayo sila nga miayo sa naguba nako nga internet Fiber optic connection.

Giingnan ko sa mga technician nga gipadala sa Globe Telecom aron pag-ayo sa akong linya, nga gibag-ohan gyud nila’g linya ang akong fiber connection.

Salamat kaayo Globe Telecom! Pwerteng kusoga sa akong internet sa balay.