Kausaban

Nalipay diay kaayo si Presidente Bongbong Marcos sa pagkamugna sa Lusaran-Busay Bulk Water Project nga gihimo sa JE Hydro & Bio-Energy Corporation, diin ang tubig gikan sa Barangay Lusaran gibomba paingon sa Barangay Busay.

Gikuha sa Metro Cebu Water District (MCWD) ang JE Hydro aron makaangkon na og tubig ang mga nagpuyo sa kabukiran, sama sa Barangay Busay, Apas, ug uban pa nga mga dapit nga sa dugay’ng katuigan wa gyuy permanenteng tubig.

Unya kay moabot man og 100,000 ka baril ang mabomba sa JE Hydro kada adlaw, ug dili man kini mahurot paggamit sa nagpuyo sa kabukiran, ang ubang tubig ibuga ipon sa linya sa MCWD diha sa JY.

Sa ato pa, madugangan ang pundo nga gamiton sa MCWD ug mas daghan na ang maserbisyohan. Mao kini nga gidayeg ni Presidente Bongbong Marcos ang maong proyekto nga gisudlan sa JE Hydro ug sa MCWD.

Kaniadtong miaging Huwebes, gi-celebrate sa JE Hydro didto mismo sa Barangay Lusaran ang “New Beginning” ug gitakda gani unta nga motambong sa maong kalihokan si Bongbong, apan nagpadala na lang og recorded video message.

* * *

Hawan na man diay kaayo ang mga karsada sa Carbon Market, ilabi na ang MC Briones Street ug Quezon Boulevard nga kaniadto pwerteng samoka.

Nakaagi man gud ko didto kaniadtong miaging Huwebes sa gabii ug napasiga ang akong mga mata. Unya, gitan-aw nako ang “overview picture” sa karaang Carbon market nga gubot pa kaayo, ug nakapanglingo-lingo ko.

Nakaingon ko nga dili na kinahanglang kampanyahan pa nimo ang mga tawo kay sila mismo makakita sa kanindot na sa Carbon ubos sa administrasyon ni Mayor Michael Rama.

Ang Freedom Park nga nagkayamukat sa mga barung-barong sa mga tindera ug wa na gyuy bisan gamay nga park, karon makita nimo nga tinuod na gyud nga park. Suroya ninyo didto aron kamo gyud ang makakita.

Abi ninyo, ang pagpahapsay sa siyudad mahimo man gyud kon wa lay mobabag. Kaniadto gud sa nangaging administrasyon, basta dunay isugyot nga kausaban nga maglambigit og mga vendors, duna man dayoy modupa.

Unya, ang mayor sab mokonsinte man dayon ug dili na ipadayon ang pagmugna og kausaban, mao na nga sa kadugay na sa katuigan, ang Carbon kaniadto nagpabilin nga gubot pas lukot.

Sa programa ni Mayor Rama nga, “hapsayon ang gubot,” makita nimo nga anam-anam na nga nahapsay ang Carbon. Unya, ang mga tindera maayo na nga pagkahimutang.

Tiaw mo nga kaniadto, ang Warwick Barracks gihimo na lang unta nga “residential area” sa mga abtik. Aw, bisan ang kanhi Freedom Park nga gibutangan kuno’g tindahan, apan diay mga balay na.