EDITORYAL - Kausaban sa Sinulog 2023

Nagtinguha karon ang pipila ka mga kadagkoan sa siyudad sa Sugbu nga did-an ang pagpahigayon og street parties, higpitan ang paghatag og permit sa mga mopahigayon og konsiyerto ug duna pay mga sugyot nga mag-liquor ban atol sa Sinulog sa sunod tuig.

Gusto ni Konsehal Philip Zafra nga walay tugotang magpahigayon og street parties bisan og dili na sa naandang rota sa Sinulog Grand Parade pagahimuon ang street dancing sa maong selebrasyon karong Enero.

Ang tumong niini mao nga aron dili mabahinbahin ug mainat og maayo ang mga magbalantay nga polis atol sa maong okasyon gumikan sa kadaghan unya sa mga tawong modagsa.

Napanglantawan man nga posibleng modagsa anang panahona ang mga tawo sa Cebu City tungod sa gipaluagan na nga restriksyon human sa duha ka tuig nga walay linawas nga mga kalihokan nga maoy naandan.

Ang Sinulog Grand Parade ug ang matud pa Sinulog dance competition anha pagahimoon sa South Road Properties.

Lapad kaayo kini nga lugar sa dakbayan nga halos wala pay daghang mga edipisyong natukod gawas lang sa usa ka dakong mall ug bag-ong hotel ug casino.

Nindot hinuon kaayo unya ang magpahulagway panghandumanan sa mga dumuduong ang lugar tungod daplin kini sa dagat kay nag-atubang sa baba sa Mactan Channel ug ingon man ang bag-ong atraksyon nga mao ang CCLEX nga nagkonektar karon sa lungsod sa Cordova.

Apan anang adlawa dili na unya sama kasadya sa nanglabay nga mga Sinulog ang naandang uptown ug downtown area sa siyudad nianang adlawa.

Samtang magmahay niini ang mga senior citizens ug mga gagmay’ng mga bata kay di na makakita sa parada gawas lang kun makalakaw sila padung sa SRP, naa pa ang hulga sa pandemiya sa Covid-19.

Hinuon, mabulahan og maayo niini ang mga establisamentong duol sa SRP ug ma-promote sab ang maong lugar nga makatabang unya sa dugang kalamboan sa siyudad.

Ang pangutana nalang niini kun dili ba gyud mabahin unya ang atensyon sa mga polis ug magbantay sa kalinaw nga mas molapad naman unya ang ilang bantayan kay mabahin man ang mga tawo.

Ang dakong kausaban lang niini, momenus ang basura sa city proper apan adto usab kini magtipun-og sa SRP.