Huyang ang ebidensiya

Gitugotan sa hukmanan ang petition for bail nga giduso sa aktor ug host sa television nga si Vhong Navarro nga nag-atubang og kasong pagpanglugos nga gipasaka sa usa ka modelo.

Ang kasong pagpanglugos usa ka capital offense diin ang mag-atubang niii dili tugotan nga makapiyansa gawas kun sa tanaw sa huwes human niya makita ug mapaminaw ang mga ebidensiya huyang kini.

Sigun sa Sesction 13, Article III sa atong 1987 Constitution ang tawo nga mag-atubang og kaso dili balibaran nga makapiyansa kun ang kaso nga iyang giatubang ang silot dili silot kamatayon o pagkapriso sa tibuok niyang kinabuhi tungod kay dinhi ang piyansa usa ka katungod.

Apan kon ang kaso nga giatubang sa usa ka tawo ang silot kamatayon o pagkapriso sa tibuok kinabuhi dili siya tugotan nga makapiyansa. Pero kun ang ebidensiya nga gipresentar batok kaniya sa gihimo nga pagdungog sa iyang giduso nga petition aron makapiyansa huyang, puwede siya nga tugotan nga makapiyansa. Dinhi ang piyansa usa ka diskrisyon o pribilihiyo nga itugot sa hukmanan.

Ang piyansa usa ka matang sa katungod ug usa ka matang sa diskrisyon o pribilihiyo nga itugot sa hukaman. Ang piyansa usa ka matang sa katungod kun ang salaud nga nahimo sa usa ka tawo nga mopiyansa ang silot dili pagkapriso sa tibuok kinabuhi o kamatayon. Samtang ang piyansa usa ka diskrisyon o pribilihiyo kun ang salaud nga nahimo sa tawo nga mopiyansa ang silot kamatayon o pagkapriso sa tibuok kinabuhi apan huyang ang ebidensiya batok kaniya.

Karon, kay gitugotan man sa hukmanan ang petition for bail sa akto ug host sa television nga si Vhong Navarro, unsa may boot ipasabot niini? Sa walay paghisgot sa merito sa kaso nga pagpanglugos nga giatubang sa aktor maingon nato nga huyang ang ebidensiya batok kaniya ug posible nga maabsuwelto kini sa kaso ga iyang giatubang.

Karon nga nahatagan na sa iyang temporaryong kagawasan ang aktor, ato na unyang mapaabot ang iyang paggawas sa television.