Paghuwat sa di kapugngan
Angay tang magpasalamat sa kasaba ug kamasuk-anon sa pagsupak sa nagpakabana nga mga sektor sa katilingban sa gipamugos ug giapura ni Presidente Ferdinand Marcos Jr. ug sa iyang mga paryente sa House of Representatives nga pagtukod sa Maharlika Investment Fund (MIF).
Kay way laing makapugong ning administrasyona. Gawas sa paglalis sa tanang binuang nilang argumento pagduso sa propaganda nga sa kalit lang nakakita sila og magic formula sa pagpalambo sa katigayonan ug pagsulbad sa tanang problema sa nasud. Ug pagtay-og nila hangtod nga mapugwat gikan sa urom nga gusto nilang ipahamtang.
* * *
Duna koy mga higala nga nadasig sa pagsupak sa pipila ka senador, apil na sa maguwang sa presidente nga si Senador Imee Marcos. Pero ako silang gipahinumdoman sa kadaghan sa mga pasalig sa mga senador sa pagkurihir sa kuwestiyonableng mga aspeto sa gipaburot nga 2023 budget–tangtangon ang confidential ug intelligence funds (CIF) ug unahon ang edukasyon, kahimsog ug panginabuhi. Pero sa niaging semana, giaprobahan nila uban sa mga kongresista ang tanang gipangayo sa Malakanyang nga way bisan usa ka dako nga naiban.
Abunda ang mga timaan nga palutson sang Maharlika.
* * *
Pero nahadlok ko nga bisan ang pagsaba-saba di paigo. Palutson lang sa pikas nga dunggan sa mga gitahasan sa paglaktod sa pagpalusot sa Maharlika. Gipaneguro nang mapasar sa House of Representatives sa wa pay bakasyon sa Pasko–mora silang gisilihan nga di nang kapaabot og laing adlaw sa pagbangkarota sa nasudnong panudlanan.
Naabtan ang mga Marcos og 36 ka tuig una nakabalik sa Malakanyang. Way luna ang kaikog sa ilang kahigwaos sa paghakop sa tanang gahom ug katigayonan nga ilang makuha.
* * *
Ang ilang troll army di mohunong sa pagpahinumdom sa tanang hingtungdan sa kadaghan sa mga boto nga nakuha sa administrasyon sa niaging eleksiyon. Di sila molunga pagkumbinser sa katawhan nga ang makabungog nila nga mayoriya sa Kongreso maoy garantiya nga matuman ang tanan nilang gusto–gikan sa CIF ngadto sa MIF.
Maong di kalikayan ang pagkabanhaw sa atong gibati dayong eleksiyon niadtong Mayo–nga posibleng wa gyod hingpit nga mobiya–nga bisan unsa pay himuon sa mabuot nga mga lungsoranon, matinuod ug mahinayon ang labing laksot nga ugma nga atong gipakigbisogan nga kapugngan.
- Latest
