Mosuporta ba mo niini?

Gusto ni Senador Bong Revilla nga pakubsan ang edad sa tawo aron nga madeklarar na kini nga senior citizen. Kamo nga nagbasa sa akong lindog karon, dili ba kamo mauwaw nga tawgon na og senior citizen?

Matud ni Revilla, gusto siya nga inig abot na sa pangedaron nga 56, isipon na nga senior citizen ang usa ka lumolupyo dinhi sa nasud aron kuno maka-enjoy sila sa benepisyo sa pagka senior citizen.

Bitaw, nindot kaayo ang senior citizens, basta himsog lang ang imong panglawas. Kon mokaon ka, hatagan ka og diskwento nga 20 porsiyento, ingon man sa paliton nimo nga tambal ug plite sa mga sakyanan.

Dinhi sa Cebu City, kon may sakyanan ang senior way bayad sa parking fee basta dili lang mosubra sa tulo ka oras, ug may madawat pa nga cash assistance nga P12,000 ang tuig.

Sa balaudnon ni Revilla, wa man sab gibutang nga kon mag-56 na ang usa ka empliyado, kinahanglan nga moretiro na kini sa trabaho.

Ang kagamhanan maoy mabentahaan niini kay modako man ang iyang magasto. Kon maaprobahan ang balaudnon ni Revilla, modako pa gyud ang gastohon sa siyudad.

Unya, ang kita sab sa kagamhanan gikan sa buhis, mokunhod kay ang giiban sa bayad sa mga senior gikan sa mga pribadong establisimento, ila man na nga ibanon sa ibayad nilang buhis. Nahibawo ba mo niini?

Pananglit ako’y pangutan-on, husto na ang 60 nga maoy isipon nga senior citizen kay ang 56, batan-on pa kaayo uy.

* * *

Karong Paskoha, gitugot na ang Misa sa kaadlawon nga gitawag sa uban og “Simbang Gabi.”

Nindot ang gipahibawo ni Koronel Ireneo Dalogdog, ang director sa Cebu City Police Office nga modestino siya og daghang polis sa lainlaing dapit sa siyudad, ilabi na duol sa mga simbahan.

Wa malilong kanato nga mihinay-hinay na pagdagsang ang mga kawatan karong panahona, kay kadtong mga tapolan motrabaho ug dunay mga bisyo. Mangawat na lang sila aron ikasuporta sa ilang bisyo.

Kon mosimba mo sa kaadlawon, ayaw pagdala og mga mahalong butang, unya pagbantay gyud kanunay. Ayaw mo paghurot pagpanimba, kinahanglang may mahibilin sa balay.

Ako, kaduha na ko gisu’d og kawatan sa balay. Gusto ko nga sa ikatulong su’d nila, magdagan sila nga magkadugo ug magtapion na sa ilang mga dughan, kana kon dili matumba.

Dili ko mosakay sa baruganan sa uban nga angay kunong kaloy-on ang mga kawatan kay nangita ra kuno kini og paagi nga mabuhi.

Nakahinumdom ba mo sa anak sa usa ka taga radyo nga gipatay kay nakamata nga diha sa iyang kwarto ang kawatan? Usbon nako, magbantay gyud ta karon mga friends.

BALITAHOM Atty. Jose Marie N. Poblete

Unta maantigo'g math

Adunay mga senador ingon man pundok sa mga magpapatigayon nga mipadayag sa ilang pagsupak sa balaodnon nga magpundar sa P275 bilyones nga Maharlika Wealth Fund (MWF) tungod kay ang tinubdan sa pundo niini gikan man sa GSIS, SSS ingon man sa Land Bank of the Philippines. Angayan nga tun-an kini pag-ayo kay anaa ang kakuyaw nga ang kwarta mahanaw tungod sa sayop nga pagdumala o sa kurapsyon.  Gihulagway sa uban nga kalkulado’ng risgo ang Maharlika Wealth Fund.  Manghinaut lang kita nga ni’ng ilang pagkalkulo, maantigo sa mathematics ang atong mga magbabalaod.  Fezteleern!

Multi-tasking senior citizens

Adunay balaodnon nga giproponer ni Senador Bong Revilla Jr., nga buot magpaubos sa edad sa mga gikonsiderar nga senior citizen gikan sa 60 anyos ngadto na sa 56 anyos.   Kon mapasar na ang maong balaod, dali na tawgon nga senior citizen ang Pinoy, apan daghan gihapon ang iyang mahimo ug makaya nga trabahoon.  Gani ang akong tigulang nga silingan nangandak man nga mahimo pa niya ang pag-multi-tasking, nga sa ato pa, mahimo niya’ng dunganon ang pagkatawa, pag-ubo, paghatsing ug pagpangihi sa usa ka higayon. Pagkatoytoy!

Kasohan ang smuggler

Nakigkumboya ang SINAG, usa ka pundok sa mag-uuma, sa DA ug sa BoC alang sa pagpasaka og kaso nga economic sabotage niadtong nagpaluyo sa pagpayuhot sa mga smuggled nga sibuyas-bombay.  Nakasakmit ang BoC og pinayuhot nga 1,000 ka sako nga sibuyas-bombay didto sa Tondo, Manila.  Dalaygon ang paggukod sa mga mag-uuma sa mga smugglers.  Sa ilang panaghugpong, napamatud-an ang panutihon nga “In unity there is strength”. Dugang pa sa akong amigo, mahinungdanon nga protektahan ang lokal nga industriya sa sibuyas-bombay tungod kay alang kaniya, “In ONION, there is STRONG.”  Madahaaan!

Integridad batok kantidad

Matud pa ni DA Assistant Secretary for the Visayas, Salvador Diputado, ang taas nga presyo sa pula nga sibuyas-bombay epekto sa “law of supply and demand” ug nga mapaubos lamang kini kon motugot ang kagamhanan sa pagpasulod sa mga imported nga sibuyas-bombay sa atong ka-merkadohan.  Daw gihulagway sa DA nga wala pa’y nahitabo nga smuggling sa maong mga produkto.  Apan sukwahi ang tinuod nga hitabo kon basehan ang resulta sa pagpang-raid sa Bureau of Customs.  Cute tingale paminawon ang pulong nga ‘smuggling’, apan salaod kini nga kuyanap gihapon tungod kay matud pa, “Kon ang matinud-anon nga opisyal adunay integridad, ang kurap nga opisyal usab adunay kantidad”.  Muleeeng!

‘Farm-to-pocket’

Gitakda nga lagdaan ni Presidente Marcos ang usa ka joint administrative order alang sa paghimo og mga farm-to-market roads (FMRs) sa tumong nga mapaseguro ang hamugaway nga paghatud sa mga produktong agrikultura gikan sa umahan ngadto sa kamerkadohan.  Ang mga ahensya nga tahasan sa maong programa mao ang DA, DPWH, DILG ug DOT.  Maanindot ang tumong sa maong programa. Sa kadako unya sa budget  nga itagana niini, manghinaut kita nga dili kini sakiyohon ug mahulog nga “farm-to-pocket” roads ang mahitabo sa maong programa.  Maoy gidangat!