Nakapasamot sa duda sa Maharlika
Ang suporta ni kanhi Presidente Gloria Macapagal-Arroyo sa Maharlika Sovereign Wealth Fund makapasamot lang sa mga pagduda sa tinuod nga katuyoan sa pundo. Ang pasalig ni Arroyo nga tinarung ang pundo, imbes makapakalma, makapasamot sa kahadlok sa mga magbubuhis sa dangatan sa ilang kuwarta.
Kay ang siyam ka tuig nga pamunoan ni Arroyo naputos sa mga eskandalo. Pipila sa labing dali nga mahinumdoman: P728 milyones nga fertilizer scam sa 2004; P18.4 bilyones nga NBN-ZTE scandal sa 2007; ug P10 bilyones nga pork barrel scandal sa 2007 hangtod sa 2009.
* * *
Si Arroyo morang minatay nga nibangon sa lubnganan (palihug laktawi lang ni kon nagkaon ka). Nadugta nang dagway ug lawas, namungingi sa kaliboan ka mga wati, naputos sa baga nga tagiptip gikan sa lapok nga nalubngan sud sa daghang katuigan, nangalisbo sa tumang kabaho ug gikuninitan sa gutom nga mga langaw.
Bisan sa nagsiwil niyang bangkil ug lagom nga wait, nipugos pagpahiyom, nga nibugwak sa gininhawa nga ang kalangsi sama kabantok sa huwaranan sa dubok nga mga isda, ug nipasalig nga humot ug limpiyo kaayo ang gahong nga iyang gihaw-asan.
* * *
Ang kaluod sa track record ni Arroyo karibalan lang sa iyang pasalig nga ang labing lig-on nga garantiya nga tarungon sa pagduma ang pundo sa Maharlika mao ang paglingkod sa presidente sa governing board.
Matod ni Arroyo mao ni ang kinakusgang mensahe: Nga ang kinatas-an nga opisyal sa nasud andam nga manubag sa mga magbubuhis nga Pilipinhon sa bisan unsay mahitabo sa mga transaksiyon nga gamitan sa higanteng pundo.
* * *
Ang pagpangunay ni Presidente Ferdinand Marcos Jr. sa pagpanimon sa pundo, nga agresibong giduso sa iyang ig-agaw nga speaker, anak nga deputy majority leader ug kadudahang mga alyado sama ni Arroyo, makahingpit lang sa urom sa katawhan. Kay si Marcos Jr. wa mabantog sa iyang kaligdong.
Hinunoa, gikaintapan sa pagpamakak og pangangkon sa mga kurso nga wa niya mapasari; pagka konbikto sa wa pagbayad og income tax dihang mao pay bise gobernador ug dayon gobernador sa Ilocos Norte; ug niduyog sa iyang inahan ug ubang mga sakop sa pamilya sa pagpaugat pagdumili sa pagbayad sa P203.8 bilyones nga utang sa estate tax.
* * *
- Latest
