Ang pagdagsa sa mga deboto

Ang Misa de Gallo maoy magsilbe’ng dryrun sa mga dagkong kalihokan atol sa kapistahan ni Senior Sto. Niño diin dinhi malili ang bagang duot sa mga deboto nga mosalmot sa misa.

Apan mora’g kumingking lang seguro ang gidaghanon sa mga motambong sa Mida de Gallo sa Basilica itandi unya sa misa novenario sa umaabot fiesta sa Enero sunod tuig sanglit tanang mga simbahan man magpahigayon og Misa de Gallo ug sa fiesta sa Basilica ra man.

Bisan pa man niini kanang atong giingong kumingking, dako na kaayo kana kay ma-fiesta man o dili, aduna may Misa de Gallo o wala modugok man gyud ang mga deboto ilabi na kadtong adunay mga panaad.

Matud ni Father John Ion Miranda sa Basilica del Sto. Niño nga nakatala na sila og 120,000 ka mga tawo kada adlawng Domingo nga nanimba sa Basilica sukad sa buwan Hulyo hangtud sa Oktobre diin adunay pagsaka sa gidaghanon nga 150%.

Sa ordinaryong mga adlaw sa pagsimba pa lang kini ug mas modaghan pa diin gipanglantawan nga modoble ug mo-triple pa gani ang gidaghanon sa mga deboto kay morag giuhaw karon ang mga tawo nga wala makahimo sa mga tulomanon sa fiesta senyor sulod sa duha ka tuig tungod sa pandemic.

Tungod kay wala namay mga restrictions ug balik na sa pre-pandemic ang sitwasyon mahitabo gyud kining gipanglantawan. Busa gikinahanglan nga mahan-ay ang tanan aron malikayan ang mga dautang panghitabo sama sa stampede simbako lang. Hinuon dili man ingon niana ka panatiko ang mga Sugboanon nga magmarka bahala nalang basta makaduol lang sa imahen, safety first man gyud ta.

Angayan hinuon nga seguradohon sa mga tagdumala ug sa mga otoridad ang worst-case scenario aron walay pagamahayan sa umaabot.

Kini sa relihiyosong aspeto pa lang  ug wala pay labot ang sa cultural aspect. Kay sagad ra ba sa mahitabo tungod sa sobrang kalipay kay lagi naay dakong selebrasyon makalimot nalang sa posibleng mahitabo.

Busa karon pa lang ipahibawo nang daan nga dili tugotan ang street party sa bisan asa ilabi na sa mga kanhi Sinulog route kay basin nagsalig ang mga tawo nga tua sa SRP ang grand parade pwede na magparty sa Osmeña Boulevard. Dili kini tugotan matud sa pangulo sa Committee on Public Order nga si Konsehal Philip Zapra.

Dinhi man gud magsugod ang kasamok. Busa dili nalang gyud tugotan aron walay labad sa ulo ug seguradong mopatigbabaw ang kalinaw.