Maharlika investment
Giduso sa Ubos Balay Balauranan ang House Bill No. 6398 nga gipangamahanan nila ni House speaker Martin Romualdez nga ig-agaw sa Presidente ug Deputy Majority leader Ferdinand Alexander Marcos, anak ni Presidente Ferdinand “Bongbong” Marcos Jr., nga nagtingoha sa pagpabarog sa Maharlika Wealth Fund Corporation nga maoy magpadagan sa wealth fund sa nasud nga ang magsilbing chairman mao mismo si President Bongbong Marcos Jr.
Kining maong balaudnon naaprobahan na sa Committee on Banks sa Ubos Balay Balauranan. Ubos niining maong balaudnon ang Government Service Insurance System moamot og 125 bilyones ka pesos (P125B), Social Security System 50 bilyones ka pesos (P50B), Land Bank of the Philippines 50 bilyones ka pesos (P50B) ug Development Bank of the Philippines 25 bilyones ka pesos (P25B) alang sa pasiunang pundo sa Maharlika Wealth Fund Corporation.
Kining maong balaudnon nakasugat og pagsupak og pag-alanganin sa pipila ka mga magbabalaud. Sa Senado si Senador Imee Marcos ang igsoon sa Presidente supak sa paggamit sa pundo sa SSS ug GSIS aron ipuhonan sa langyaw nga corporate bonds. Gusto usab sa senadora ang transparency ug accountability sa pagdumala sa pundo sa Maharlika.
Ang Alliance of Concerned Teachers mirehistro usab sa ilang pagsupak sa giduso nga balaudnon ug gihulagway ang balaudnon nga usa ka dautang plano sa sindikatong pamilya sa mga Marcos nga gustong isugal ang pundong salapi sa mga trabahante sa gobiyerno ug isalig lamang sa kadudahang mga kamot. Isip sakop sa SSS, ang akong pangutana sa mga nagdumala niini, may pundo diay nga 50 bilyones ka pesos alang sa Maharlika Wealth Fund ang SSS?
Ang akong nahibawan, nagdumili ang SSS sa paghatag og duha ka libo ka pesos nga umento alang sa pension sa mga sakop niini tungod sa kakuwang sa pundo. Kun wala pa mangugat si Presidente Duterte nga ihatag kini, dili g’yud mohatag ang SSSS. Mihatag man tuod pero usa ra gyod ka libo. Ang balance nga usa ka libo wa gyod mahatag. Mibiya na lang si Presidente Duterte sa Malakanyang. Pahihumdom lang ning ako sa mga opisyal sa SSS.
- Latest
