katekesis No. 52

Diakonia

Buntag to sayo sa dihang giduaw ko sa ordinahanan sa pagka diyakono. Kaila kaayo ko niya sanglit ang iyang pamilya mao man ang tag-iya sa luna nga gihimong parokya karon didto sa Mohon.

Silingan pud iyang lungsod sa Parokya diin ako nangalagad. Taga Badian siya. Nagpasabot lamang kini nga ako tiguwang na.

Kay kun dunay bag-ong maordinahan nagpasabot man kini nga laing tuig na usab ang puno sa akong panuigon isip pari. Adunay mga personal effects nga akong gipaambit kaniya.

Ako siyang giingnan nga ako nipaambit tungod kay ako mismo kaniadto ang nakaambit man pud sa kaayo sa Ginoo pinaagi sa mga tawo nga nagmanggihatagon sa ilang kaugalingon ug bahandi aron lang makatabang Kanako.

Sa wala pa ang Segundo Vaticano dunay mga minor orders kaniadto sama sa porter, exorcist, lector, acolyte, subdeacon. Ang mga major orders mao kadtong Diaconate, Presbyterate ug Episcopate. Apan gumikan sa mga liturgical reforms sa Konsilyo sa Segundo Vaticano bugtong ang diaconate, presbyterate ug Episcopate maoy nahabilin.

Ang pagka-dyakono maoy unang ang-ang alang sa Sagradong Orden. Ang ubang mga minor orders karon sama sa lector ug acolyte ang nahimong ministries na lamang karon.

Bisan gani ang pagka exorcist wala naman gani elaborate nga installation nga pagahimoon.

Apan ang lintunganay sa pagkadyakono nagasukad sa pulong Diakonia nga nagpasabot og pangalagad. Kay ang atong Ginoo wala man moanhi aron alagaran kondili aron moalagad.

Ang basahon sa mga Buhat sa Apostoles (Buh. 6;1-6) ang naghulagway kanilang mga dyakono ingon mga kaabag sa mga Apostoles diha sa pagpahiyagon sa pag-atiman sa mga kaigsuonang nagkinahanglan.

Sila kadtong niapod apod sa mga kabtangan aron walay ni usa ka sakop sa katilingban ang magkulang. Apan karong mga panahona ang mga dyakono nahimong ang ang agig pagpangandam sa pagkapari. Hinuon dunay permanent deacons labina gyud sa mga dapit nga kulang ang mga kaparian nga mangalagad sa kadaghanan.