EDITORYAL - Ayaw kalimot duna pay COVID-19

Baynte-singko ka adlaw nalang ug Pasko na. Siguradong magsadya ang kadaghanan sa mga tawo karong mga panahona. Magsadya kauban ang banay ug mga kahigalaan apil an niini ang pagtapuk-tapok bisan asa dili lamang sa balay.

Kining paskoha maoy labing una unya human sa duha ka tuig nga pandemiya sa Covid-19. Sa nakalabay nga duha ka tuig, gipugngan ang selebrasyon tungod kay grabe pa kaayo ang hulga ug tanan apil na ang gobiyerno nag-ukon-ukon nga buhian ang mga tawo gikan sa mga restriksyon.

Apan karon nga mayoriya na ang nabakunahan kontra Covid-19 giluagan na ang mga restriksyon ug nibalik na usab ang mga panagtapok-tapok.

Samtang tuod naa pa gihapon ang mga pasidaan bahin sa social distancing, hinayhinay ng giwagtang ang paggamit og og facemask sa gawas ug sa sulod sa mga establisamento gawas lang sa mga tambalanan o pasilidad medikal.

Dili gyud ang bakuna maoy nag-inusarang rason nganong gilugakan na ang mga restriksyon kondili ang negatibong epekto gyud sa mga lockdowns ug higpit nga mga guidelines nga nakapiang gyud sa ekonomiya ang hinungdan.

Apan dili unta magkompiyansa ang mga tawo, abi kay bakunado na ug dili na gusto sa gobiyerno mag lockdown, pwede nang magpatara. Naay mga masakiton ug senior citizens nga kinahanglang protektahan diha sa mga balay.

Sa nasud sa China karon miulbo ang mga protesta ug lihok protesta sa nagkalain-laing mga siyudad niini tungod sa gipatumang lockdowns sa mga lugar nga misaka ang kaso sa Covid-19 sa miaging buwan.

Sa China nagsugod ang maong sakit niadtong tuig 2019, apan tungod sa ilang pagpasagad nikatag kini tibuok kalibotan.

Dinhi sa Pilipinas, bisan ang Department of Health napugos gyud sa pagusab sa mga polisiya niini tungod kay mismo na ang gobiyerno mitiyabaw kay nikamang na ang ekonomiya.

Apan dili angay magkompiyansa tungod kay sa National Capital Region (NCR) misaka gikan 7.5 percent ngadto sa 11.1 percent ang positivity rate sa mga kaso sa Covid-19 sugod Nobiyembre 19 hangtud Nobiyembre 26 sumala pa sa OCTA Research Group. Responsibilidad sa tagsa-tagsa ka Pilipino ang ilang panglawas, busa angay tingaling mag-amping aron magmalipayon ang Pasko.