^

Banat Opinyon

Puwesto sa night market

LINTUNGANAY - Fred P. Languido - Banat

Dugay-dugay na nga gisugdan sa kagamhanan sa syudad ang night market sa Colon.

Bisan way bag-o sa mga baligya nga imong makita apan akong naobserbahan nga nialegre og balik ang dalan Colon mataggabii.

Ang himalitan mao ang mga pagkaon sama sa barbecue, sinugbang isda, larang ug uban pa.

Nakahasol man sa mga motorista tungod kay kinahanglang sirad-an ang maong karsada apan dili malalis ang tampo niini sa ekonomiya ug ang tabang nga nahatag sa maong programa labi pa sa gagmay nga mga negosyante.

Apan angayang susihon sa kagamhanan sa dakbayan ang report nga dunay mga tawong mikabayo ug nagpahimus sa programa aron pagpadato sa ilang kaugalingon.

Dili na ni bag-o ang maong paagi sa pagpanlupig. Sigun sa kasayuran nga akong nadawat dunay mga tawong mapahimuslanon nga nakakuha og pwesto diha sa Colon night market.

Apan inay gamiton nila ang pwesto ila ni nga gipamaligya sa mahal nga kantidad ngadto sa mga negosyante nga interesado nga mosalmot sa night market.

Angayang paimbistigahan ni Mayor Michael Rama unsa ka tinuod kining maong kasayuran. Mas maayong susihon wa bay kalambigitan ang mga kawani sa market operations division sa gikatahong pagpamaligya sa pwesto diha sa Colon Night Market.

Sayon ra ning masakpan kun himoon ang kinalit nga inspection sa tanang mga namaligya. Sigurado ko nga rehistrado sa syudad kinsa kadtong mga tawo nga nahatagan og luna aron makapamaligya diha sa night market.

Kun atol sa himoon nga inspection lahi ang nag-okopar sa luna kay sa narehistro sa city hall siguradong dunay milagro nga nahitabo niini.

Ug angayang manubag ang mga tawo nga nalambigit. Ang pagpamaligya sa mga luna dili makiangayon tungod kay nahikawan ang mga tarong nga negosyante sa kahigayonan nga manginabuhi tungod sa pipila ka mga mapahimuslanon.

* * *

Unsa ba ka seryoso ang mga konsehal sa dakbayan sa Sugbo sa ilang pagbabag sa pagpatuman sa taas nga umento sa real property tax?

Hinaot di pulos pakaaron ingnon ang ilang pagkwestiyon kunohay sa gidak-on sa umento apan diay mosunod ra sa mando sa mayor.

Nakapangutana ko unsa sila ka seryoso tungod kay basi sa akong tinubdan hinay-hinay na kuno nga milugak ang mga konsehal sa ilang baruganan.

Tungod niini posibleng molusot sa konseho ang revised tax ordinance sa dakbayan nga moabot hangtod sa 7,400 ka porsiento ang gidak-on sa umento sa buhis.

Dinhi masukod ang mga konsehal kang kinsang interest ang ilang gialagaran--- sa publiko o iya sa mayor?

Kun ipamugos gyud sa syudad ang maong gidak-on sa umento sa buhis aron lang mapundohan ang gipangayo ni Rama nga P50 bilyones nga budget sunod tuig, siguradong daghan sa mga molupyo ang mag-alboroto.

NIGHT MARKET

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with