Kampeyon na sab sa COVID-19
Nahibalik ang Sugbo sa iyang karaang trono. Siya na sab ang kinadaghanan og bag-ong kaso sa Covid-19. Suma sa hubad sa OCTA Research Group sa opisyal nga mga numero sa Department of Health (DOH) nga gipagawas niadtong Sabado, Nobyembre 26, 118 ang bag-ong Covid-19 cases sa tibuok isla sa Sugbo.
Nagsunod sa Sugbo ang Cavite nga dunay 77; Kalinga, 66; Bulacan; 64; Laguna, 57; Negros Occidental, 55; Rizal, 55; Davao del Sur, 49; Benguet, 47; Cagayan, 47; Iloilo, 37; Bukidnon, 32; Tarlac, 32; La Union, 28; ug Pangasinan, 28.
* * *
Ang tibuok Central Visayas dunay 141 ka bag-ong kaso. Ang Metro Manila gihapon ang kinadaghanan og bag-ong kaso sa tanang rehiyon: 536. Nipasidaan hinuon ang OCTA nga mahimong moabot na og 1,600 ka kaso sa Metro Manila sa mosunod nga mga adlaw.
Gibasol ni Dr. Guido David sa OCTA ang mas mananakod nga BQ.1 ug BQ.1.1 nga subvariant nga maoy hinungdan sa pagsulbong sa bag-ong mga kaso. Ang mga subvariants sa BA.5 mao nay nagdominar sa paspas ug lapad nga tinakdanay sa Estados Unidos ug ubang kanasuran.
* * *
Mas makapabalaka nga numero nga nakuha sa OCTA gikan sa DOH: Ang Sugbo na maoy usa sa kinatas-an og positivity rate sa Covid-19 sa tibuok Pilipinas. Sa semana nga natapos niadtong Biyernes, Nobyembre 25, nisaka ngadto sa 12.4% gikan sa 11.5% sa gisundan nga semana.
Mas paspas ang tinakdanay sa Sugbo kon ikumparar sa Metro Manila, kansang positivity rate nisaka ngadto sa 10.6% gikan sa 7.4% sa gisundan nga semana. Nisaka sab ang positivity rate sa Camarines Sur, Tarlac, Aklan, Western Visayas, Northern Luzon, La Union, Cordillera Region ug Isabela.
* * *
Kinadaghanan og bag-ong Covid-19 cases sa Sugbo mao ang Cebu Province (56) ug Cebu City (43) nga maoy gigikanan sa 84% sa tanang kaso sa tibuok Central Visayas. Sunod nga kinadaghanan og bag-ong kaso mao ang Mandaue City (18) ug ang Negros Oriental (18).
Hinaot nga di matakdan ang ubang lugar sa rehiyon nga nagpabiling ubos ang bag-ong mga kaso: Ang Bohol duna ray lima; Lapu-Lapu City duna ray usa; ug Siquijor nga way bag-ong kaso.
* * *
- Latest
