Maayo kay miaksiyon

Miaksiyon dayon ang kagamhanang lokal sa dakbayan sa Sugbo sa akong post sa Facebook kalabot sa pipila ka karaan ug gisi nga mga Philippine flags nga dugay rang nagbitay palibot sa Plaza Independencia.

Wala abti og usa ka semana human sa akong pag-post sa mga hulagway sa nagkagusbat nga mga flag sa maong plaza, giilisan dayon kini sa siyudad. Karon atong makita nga pulos nabag-o na ang mga bandila nga nagbitay diha sa maong lugar.

Tungod niini, atong pasalamatan ang mga hingtungdang opisyales sa dakbayan sa Sugbo sa aksiyon nga ilang gihimo. Hinaut nga padayon silang moresponde dayon sa mga concern og ubang reklamo sa mga ordinaryong katawhan.

Hinuon dili kini panghinambog nga ang akong post sa maong mga hulagway sa mga flags maoy hinungdan sa pag-aksiyon dayon sa siyudad. Kini tungod kay wala man mag-viral ang akong FB post.

Naingganyo lamang ako sa pag-post sa Facebook tungod kay akong nakita nga sa pipila na ka katuigan, wala gayud matagad ang maong nangagusbat nga mga bandila sa mga hingtungdang ahensiya sa dakbayan.

Makauulaw kaayo kadto nga talan-awon. Ang Plaza Independencia maoy usa sa mga nag-unang atraksiyon sa dakbayan unya maoy mosugat sa mga turista ang karaan ug gisi nga nagbitay nga mga Philippine flags.

Hinuon kon gumikan sa akong post sa Facebook ang dali nga pag-aksiyon sa kagamhanang lokal sa siyudad sa Sugbo, dinhi nato makita ang kadako ug kaimportante sa papel sa social media karong panahona.

Apan hinaut nga dili lang nga ayha na moaksiyon ang mga opisyales sa kagamhanan kon aduna nay modukdok kanila sa mga problema sa palibot. Isip mga public servant, ilang trabaho ang kanunay nga pag-monitor sa katilingban alang sa kaayohan sa tanan.