EDITORYAL - Bike lanes

Kumusta na ang mga gipang-instalar nga plastic barriers o bollards para sa mga bike lanes sa nagkalain-laing mga dalan dinhi sa Metro Cebu? Murag pangag-pangag naman kay nangawagtang na ang uban.

Usa ka maayong lakang kining gihimo sa gobiyerno pagbutang aning mga bollards para maklaro ang bike lanes. Gihimo kini para gyud sa kaluwasan sa mga bikers o kadtong mga magbisekleta sa kadalanan.

Makatabang sab kini ug maisip pa gani nga proteksyon sab sa mga nagsakyanan nga malikay sila sa mga balayrunon o pagkapriso kun sila makadasmag og bikers kun wala aning mga bollards ug bike lanes. Apan sama sa ubang mga proyekto sa gobiyerno, maayo lang sa instalasyon sa pisikal nga aspeto apan kuwang sa maintenance.

Kun subayon kining mga dapit nga gibutangan aning mga bollards daghan ang makitang pahak-pahak na kay na-missing na ang uban.

Posibleng nadasmagan kini sa mga sakyanan ug nangaputol ug posible sab nga gikabuangan sa mga walay lingaw ug gipang-ibot kini. Sagad sa mga nangawala  mao kadtong gibutang sa mga dalan nga wala kaayoy mga tawo.

Usa niini kanang sa North Reclamation Area sa habig sa Mandaue City padung sa Subangdaku Bridge, ang mga bolts nalang nga nagkupot aning mga barriers ang nahibilin nga nigimaw sa kongkretong dalan, ang uban nitalinis na ug kuyaw na makabuslot og ligid.

Mas labing maayo nga kanang pintal nalang ang ibutang aron menus ang gastos kay wala may makawat o madasmagan ang mga walay lingaw ug mga mangaging mga sakyanan.

Ang bike lanes importante gyud kaayo karon tungod nagkadaghan na ang nigamit og bisekleta sa ilang inadlaw-adlaw nga mga lakaw. Pagpanarbaho, eskuyla, pangompra ug paugnat sa kusog gigamitan na karon og bisekleta.

Tungod sa kahuot na sab sa pipila ka mga dalan apan gibutangan gihapon og bike lanes, kinahanglan tingaling wagtangon kining paghimong ekslusibo aning bike lanes para lang gyud sa mga bisekleta.

Tugotan sab unta makagmit niini ang mga motorsiklo kun walay mga nagbisekleta anang mga orasa. Aning paagiha mapuslan og maayo ang limitado kaayong mga dalan para sa tanang road users.