Walay mananag-an nga nakadaug

Adunay gipasaka nga resolusyon sa Kongreso nga buot moutingkay sa tinuod nga panghitabo sa bola sa 6/55 lotto niadtong Oktubre 1, diin adunay 433 ka natala nga mga mananaog. Kahibulongan ang maong gidaghanon bisan pa sa pamahayag sa PCSO manager nga walay anomaliya sa maong bola. Matud pa bitaw sa pagya, “dako ang kahigayonan sa tawo nga maigo sa kilat kay sa moda-ug sa lotto”. Mosamot pagtoo ang tawo nga adunay binuang kay wala man gani mabani-og nga nakadaug ang mga mananag-an ug kadtong naghupot og bolang Kristal.  Estoryaheee!

Magdala’g dakong bunal

Gipasidan-an sa DTI ang mga online sellers nga dili mopahimulos sa nag-usab-usab nga balor sa Peso batok Dolyar, pinaagi sa pagpasaka sa presyo sa ilang mga imported nga baligya ug nga kinahanglan motuman sila sa gilatid sa ahensya nga price guidelines.  Dili maayong polisiya sa kagamhanan ang magsige lang og pasidaan.  Angayan tamdan ang pagya nga “Hilom lang sa pagdumala apan pagbitbit og dakong bunal”.  Tua ra!

Pakigbatok sa kurapsyon

Gisita ni Representative Edcel Lagman ang Buhatan sa Bise-Presidente ubos ni VP Sara Duterte tungod sa mokabat P500 million nga confidential funds nga giproponer niini sa 2023 budget kay dako ang purohan nga mahimong tinubdan kini sa kurapsyon.  Tinuod nga mawad-an ang tawo sa pagsalig sa gobyerno kon ang atong mga labing tag-as nga buhatan dili apilon sa pagsusi. Apan angayan usab sustenihan ni Rep. Lagman ang iyang pamahayag kay ginaingon nga “hataas ang dalan sa pagpakigbatok sa kurapsyon ug wala kini laktoranan”.  Kumbati!

Bulawan tumoy sa bangaw

Usa ka taas nga opisyal sa Cybercrime Investigation and Coordnating Center (CICC) ang mibulgar nga milyones dolyares ang nahanaw sa mga Pilipino nga nag-gamitan sa mobile phone tungod sa mga nagpusot-pusot nga scam text nga ilang madawat.  Mailad ang tawo tungod sa saad nga “bulawan sa tumoy sa bangaw”.  Ang nakaparat kay adto na masayod ang tawo nga nailad diay siya inig-abot sa tumoy diin walay bangaw ug labaw nang walay bulawan.  Tinuod ang panultihon nga “mas sayon pa ang pag-ilad sa tawo kay sa pagkumbinsir kaniya nga nailad siya”.  Fezteleern! 

“Acts of deliciousness”

Gisikop sa kapolisan ang tag-iya sa sari-sari store didto sa Barangay Valencia, Carcar City human siya giingon nga mihikap ug mikumot sa totoy sa usa ka customer nga babaye.  Dili kadto unang higayon nga nanghikap ug nangumot og totoy ang suspetsado. Gipasaka-an og kaso nga acts of lasciviousness ang suspetsado kinsa mihimakak sa maong pasangil kaniya.  Tingale, tungod sa iyang pagkadukirok, nagtoo ang suspetsado nga lami ang iyang gibuhat busa angay lang kini paga-tawgon og “acts of deliciousness”.  Pagkatoytoy!