Daghag bisita

Nikalit kuno og kadaghan ang nahinumdom pagbisita ni Mayor Michael Rama didto sa iyang pinuy-anan karon nga ting-renew sa kontrata sa mga casual ug job order nga kawani sa City Hall.

Ilang tuyo dili ang pagpangumusta sa kahimtang sa mayor kun dili aron mohangyo nga malugwayan pa ang ilang mga kontrata.

Daghan man gud sa mga trabahante sa City Hall ang nahingawa nga mawad-an na sila og trabaho human gimando sa mayor ang pagreview sa performance sa mga kawani isip kabahin sa iyang tinguha nga mahimong sama sa Singapore ang syudad sa Sugbo.

Sulod sa pipila ka adlaw nabani-og nga dunay gibana-banang 2,000 ka mga contractual ug JO sa City Hall ang dili na mahatagan og bag-ong kontrata.

Gipasabot sa mayor nga wala pay final nga listahan. Apan daghan na ang mikisi-kisi ug diha ganiy mga pasangil nga ang naglangkob kuno sa komitiba nga gitahasan sa mayor mga kaalyado sa Bando Osmeña Pundok Kauswagan.

Kataw-anan apan dunay mga mihimo sa maong intriga aron masalbar ang ilang mga trabaho.

Tungod sa kaguliyang nga hangtud ang mga paryente sa mayor giingong nasuko niya, nahukman ni Rama nga siya maoy mangunay paghashas sa mga kawani nga angayang magpabilin.

Gipasalig ni Rama di siya mamolitika sa pagpili kinsay renewhan ug kinsay dili. Iyang giya sa pagpili mao ang performance sa kawani.

Kun dili ka bulakbol ug kawatan dili ka angayang mabalaka.

Kun tinud-on ni Rama ang iyang pasalig siguradong daghan gyud ang masuko niya.

Dili lang ang mga hingtungdan nga empleyado kun dili lakip na sa mga padrino niini nga mga politiko.

Bisan ang mga kauban niya sa partido kang kansang mga tawo maapektuhan siguradong mahiubos niya.

Apan di angayang mabalaka si Rama tungod kay husto ang iyang gibuhat. Panahon na nga hunongon ang paggamit sa City Hall nga puhonan sa pamolitika.

Dili husto nga ang mga supporter sa mga politiko sweldohan sa buhis sa katawhan bisan og way klarong trabaho.

Gisweldohan bisan way trabaho tungod lagi kay rekumendado og politiko o ba kaha lider ug dako og natabang panahon sa kampanya.

Kun buot sa mayor molampus ang iyang tinguha, husto ang iyang gihimo nga pagsugod og panglimpyo diha sa iyang kaugalingong tugkaran.