Subay sa unang 100 ka adlaw
Tangkod nga 100 ka adlaw na ang administrasyon ni Presidente Ferdinand Marcos Jr. karong Sabado, Oktubre 8, 2022. Ang mosunod pipila lang sa mga nahitabo (ug wa mahitabo) sukad sa iyang pagbalik sa Malakanyang:
• Nitibugsok ang peso sa kinaubsan nga ang-ang sukad masukad, P59 na ang usa ka US dollar;
• Niburot ang nasudnong utang ngadto sa P13 trilyones, nga nagkahulogan nga utangan og P118,000 ang kada Pilipino, apil na ang mga bata nga mao pay pagkahimugso;
* * *
• Nisamot ang krisis sa asukar tungod sa iyang nukus-nukos nga liderato (una, nisugo og importasyon sa 600,000 metric tons nga asukar; dayon gitulisok ang mga opisyal nga nipirma sa importasyon sa 300,000 metric tons; nipasalig nga normal ang suplay; sa wa pa mosugo sa importasyon sa 150,000 metric tons);
• Duha na ka sakop sa media ang giluba (si Percy Lapid nga gibanhigan ug gipatay sa Las Piñas niadtong Lunes sa gabii ug Rey Blanco sa Negros Oriental nga gidunggab niadtong Septiyembre);
• Tulo na ka biyahe sa gawas sa nasud nga gipahibawo (sa Indonesia, Singapore ug New York sa niaging buwan) ug usa ka biyahe nga gitago unta pero nag-viral sa social media (Singapore Grand Prix niadtong weekend);
* * *
• Tulo na ka opisyal sa administrasyon ang natangtang, usa nila kaduha gitaktak (si Victor Rodriguez gipalagpot pagka executive secretary ug dayon pagka chief of staff; kanhi Press Secretary Trixie Cruz-Angeles ug kanhi COA Chairman Jose Calida);
• Duha ka bakanteng puwesto sa gabinete wa pa gihapoy natudlo (permanenteng mga kalihim sa Department of Health ug sa Department of Agriculture);
• Labing menos pito na ka parties ang iyang natambongan (thanksgiving party; birthday party ni kanhi Unang Ginang Imelda Romualdez Marcos; birthday party ni Senador Sonny Angara; birthday party ni Unang Ginang Liza Araneta Marcos; iyang kaugalingon nga birthday party; konsiyerto ni Eric Clapton sa Madison Square Garden; ug Singapore Grand Prix sa Formula One Paddock Club);
* * *
• Wa pa mabayri ang 33 anyos na ug kinadak-an nga utang sa buhis (P203.8 bilyones nga estate tax sa iyang pamilya sukad sa pagkamatay ni Ferdinand Marcos Sr. niadtong 1989; ug
• Wa pa mauli sa katawhan ang binilyon ka pesos nga ilegal nilang katigayonan.
* * *
- Latest
