Mga driver nga walay disiplina

Daghan na gyud nga modern jeep ang nagdagan sa kadalanan sa Metro Cebu area nga inanay nang mihulip sa naandan nga mga pampublikong sakyanan.

Dako kaayo sila og natabang sa paghakot sa mga pasahero nga moadto sa trabaho o bisan asa nga padulngan ug ingon man sa pagpauli.

Apan nabantayan nga adunay mga driver nga hilabihan ka balasubas nga magmaneho, dili tanan klarohon nato kay naa pa may mga buotan, pero naa usay mga buangon nga dili na morespeto sa isig ka driver sa mga kadungan nga sakyanan.

Kong mo-load ug unload sa mga pasahero bisan asa lang ug ang mas nakapait kay dili motarong sa paglugar sa daplin sa karsada diha gyud sa tunga nga makahasol sa mga nagsunod nga sakyanan nga maghulat hangtud mahuman og karga o diskarga sa pasahero.

Himoon nakong sanglitanan ang mga karsada sa dakbayan sa Lapu-Lapu nga gagmay pa mosamot gyud ka huot sa traffic kay malangan man sa mga modern bus nga dili mopadaplin o mopidpid sa daplin aron makaagi unta ang nagsunod, sagad gyud ni mahitabo dapit sa eskwelahan sa Barangay Babag.

Isip mabuot ug responsableng driver angayan magpangikog sila sa uban nga nagdali usab sa ilang mga adtoanan.

Dili lang sa Lapu-Lapu sanglit himoon usab nila kini diha Mandaue City kanang padung sa unang taytayan, ang mga sakyanan naglinya apan kining mga modern bus sutoy sutoy lang ug dayon singit ug mangilog og agianan aron mauna og subay sa tulay padung sa Opon.

Kinsa man ang wala magdali, ang tanan tawo nagdali pero makalagot nga ikaw naglinya ug kalit lang mo insert ang mga dagkong sakyanan nga dili managana sa pagsaghid sa ubang sakyanan.

Sa giingon nako sa unahan nga dili tanan driver balasubas naa usay buotan pero kadtong mga feeling tag-iya sa karsada angayan seguro seminaron aron mahinumdum sa road courtesy.

Usa usab ni nga angayan tan-awon sa mga traffic enforcers nga dili exempted kining mga matang sa sakyanan sa lagda sa trapiko ug kong makita nga dunay nalapas haum lang nga dakpon ug papanubagon sa ilang kalapasan aron sila magmatngon.