EDITORYAL - Di maayong panag-ingnan
Peligroso kaayo kining pag annex sa Russia sa pito ka mga lugar sa Ukraine pinaagi sa referendum.
Ang makahadlok niini mao ang tubag sa Amerika ug sa North Atlantic Treaty Organization (NATO).
Ang maong referrendum wa ilha sa nasud sa Ukraine ug gitawag nila kini nga minaomao nga referrendum.
Ang referrendum usa ka matang sa eleksyon kun diin ang mga molupyo ang padesisyunon kun sila mosugot o dili.
Matud pa gipabotar sa Russia ug mga lokal nga mga lider sa maong mga rehiyon ang ilang mga konstituwente kung buot pa silang magpabilin ubos sa Ukraine o mopasakop sa Russia.
Ang mga lider sa maong mga rehiyon tinudlo nang daan sa Russia ug mao sab ang nagpasiugda og rebelyon
batok sa Ukraine.
Makita sab sa mga videos nga gipakita sa Russian tv nga dunay mga sundalong Russians nga kuyog sa mga election officials nga nagbalaybalay pagpabotar sa mga Ukrainians.
Kini mao rason ngano nga gikwestyon ang kabalido ug katarungan sa maong referrendum. Giisip kini sa Ukraine ug sa West nga ilegal ug drama lang.
Samtang nangugat ang West ug Ukraine sa pagsaway, si Russian President Vladimir Putin miingon nga tungod sa resulta nga nagpakitang mas gusto sa kadaghanan sa maong mga rehiyon nga magpasakop kanila, giisip nila nga mga molupyo na sila karon sa ilang nasud.
Tungod niini, responsibilidad niya nga panalipdan ang maong lugar gikan sa mga kaaway niini.
Ang ilang gibuhat way kalainan sa gihimo nila sa Crimea pila ka tuig na ang nilabay.
Dili kini maayong panag-ingnan. Gipakita sa Russia nga kun gamhanan mahimong ilugon ang teritoryo sa laing nasud. Ang nahitabo sa Ukraine dili layong mahitabo sa ubang mga nasud sama sa Pilipinas.
- Latest